Lehtesirat fiskale

Legjislacioni për akcizat ka parashikuar rastet për të cilat operatorët mund të përfitojnë përjashtim nga pagesa e akcizës apo nivel të diferencuar akcize.

Lehtësirat fiskale përfshijnë rastet si më poshtë:

1. Diferencimi i akcizës

A. Në import

Në rastin e importit të produkteve që u nënshtrohen akcizës, niveli i taksimit të të cilave sipas shtojcës 1 bashkëlidhur, varet nga sasia e prodhimit faktik të vitit të mëparshëm kalendarik, importuesit duhet të paraqesin pranë Departamentit të Akcizës në Drejtorinë e Përgjithshme të Doganave (DPD), një dokument me të cilin të deklarojë sasinë e prodhimit të kompanisë prodhuese të kësaj kategorie/lloj produkti.

Për të përfituar nga niveli i diferencuar i akcizës, subjektet e interesuara aplikojnë në DPD duke paraqitur:

1. Kërkesë me shkrim
2. Deklarim i kantinës prodhuese
3. Dokument i certifikuar nga autoriteti fiskal mbikqyrës i cili duhet të plotësojë njëherazi kushtet e mëposhtme:

• Të lëshohet nga kompania prodhuese e kategorisë/llojit të produktit të importuar, pavarësisht nga vendi eksportues;
• Të jetë i certifikuar/miratuar nga autoriteti fiskal mbikëqyrës i prodhuesit në shtetin përkatës;
• Të tregojë sasinë faktike të prodhimit total të vitit të mëparshëm, jo vetëm për markën dhe llojin e amballazhit të produktit që po importohet, për totalin e të gjitha markave e të produkteve të të njëjtës kategori/lloj produkti të prodhuar prej kompanisë prodhuese dhe pavarësisht llojit të amballazhit.

Shembull: Kategoria/lloji i produktit të importuar është birrë. Kur fabrika prodhon disa marka të ndryshme birre dhe në lloje të ndryshme ambalazhesh, atëherë dokumenti vërtetues duhet të tregojë sasinë e prodhimit të vitit të kaluar, jo vetëm për markën dhe llojin e ambalazhit të birrës që po importohet, por për totalin e të gjitha markave të birrës të prodhuara për çfarëdo lloj ambalazhi të përdorur në të njëjtën fabrikë.

B) Për prodhimin vendas:

Dokumenti i paraqitur nga Operatori i Akcizës në D.P.Doganave për të përfituar nivel të diferencuar akcize duhet të jetë i lëshuar nga Dega Doganore mbikqyrëse duke përcaktuar nivelin e prodhimit të vitit paraardhës.
Subjekti duhet të paraqesë:

• Kërkesë;
• Vetëdeklarim i Kantinës mbi nivelin e prodhimit vjetor
• Vërtetim nga Dega Doganore mbikqyrëse për nivelin e prodhimit të vitit paraardhës

Për më shumë mbi bazën ligjore referojuni Udhëzimit Nr.20 bashkëlidhur 

 2. Përjashtimi në Import për karburantin e blerë nga trupi diplomatik i akredituar, sipas parimit të reciprocitetit, të mbikqyrur nga Protokolli i Shtetit kryhet duke paraqitur pranë D.P.D sa më poshtë:

• Notë verbale nga Protokolli i Shtetit
• Formular sipas Aneksit Nr.1 bashkengjitur
• Kontratë furnizimi midis Kompanisë furnizuese dhe Ambasadës

Për më shumë informacion referojuni Udhëzimit bashkëlidhur.