Autoritetet doganore japin informacion mbi zbatimin e legjislacionit doganor, përfshirë edhe klasifikimin e mallrave. Në rastin e klasifikimit tarifor të mallrave, ai është i detyrueshem vetëm nëse lëshohet brenda kuadrit të Informacionit Detyrues Tarifor (IDT).
Lëshimi i një vendimi IDT është pa pagesë, megjithatë mund të vendosen tarifa lidhur me analiza ose raporte të ekspertëve për mallra, si dhe tarifa postare me qëllim kthimin e mallrave tek aplikuesi i IDT.
Kushtet kryesore për lëshimin e Informacionit Detyrues Tarifor janë si më poshtë:
1.Aplikimi për IDT bëhet duke plotësuar formularin në Drejtorinë e Përgjithshme të Doganave, duke patur parasysh ne plotesim si vijon:
Për çdo lloj produkti nevojitet një aplikim i veçantë. Mallrat me karakteristika të ngjashme, mund të përfshihen në një aplikim IDT si një produkt, me kusht që dallimet të jenë të parëndësishme për qëllimet e përcaktimit të klasifikimit të tyre tarifor, p.sh., "vazo balte" me dimensione të ndryshme.
të jepet një përshkrim i detajuar i mallrave, duke përfshirë imazhe ose mostra, nëse është e mundur.
I gjithë informacioni i nevojshëm për klasifikimin e mallrave duhet të jetë i saktë dhe i plotë. Pasi cdo vendim i bazuar në informacion të paplotë ose të pasaktë do të anulohet.
2.Vendimi për IDT duhet t’i njoftohet aplikuesit brenda 120 ditë nga data e pranimit të aplikimit.
3.Periudha e vlefshmërisë për një vendim IDT është tre vjet nga data e leshimit te tij.
4.Informacioni i Detyrueshëm Tarifor është i vlefshëm pas lëshimit të tij dhe i detyrueshëm si për administratën doganore dhe për mbajtësin e tij.
