Nomenklatura e Kombinuar e Mallrave

Detyrimet e importit dhe eksportit bazohen në Tarifën Doganore të Republikës së Shqipërisë.

Masat e tjera, të parashikuara nga dispozitat që rregullojnë fusha të veçanta, që kanë të bëjnë me tregtinë e mallrave, zbatohen, kur është e përshtatshme, në përputhje me klasifikimin tarifor të këtyre mallrave.

Tarifa Doganore e Republikës së Shqipërisë përfshin:

• Nomenklaturën e Kombinuar të Mallrave, bazuar në Sistemin e Harmonizuar;
• çdo nomenklaturë tjetër, të bazuar tërësisht apo pjesërisht në Nomenklaturën e Kombinuar të Mallrave ose çdo nënndarje të mëtejshme të saj që përcaktohet nga dispozita të tjera që rregullojnë fushat e veçanta, me synim zbatimin e masave tarifore që kanë të bëjnë me tregtinë e mallrave;
• nivelet e detyrimeve doganore ose autonome normale, që zbatohen për mallrat e përfshira në Nomenklaturën e Kombinuar të Mallrave;
• masat tarifore preferenciale, të përcaktuara në marrëveshjet që Republika e Shqipërisë ka lidhur me një vend ose territor të caktuar jashtë territorit doganor të Republikës së Shqipërisë, ose grup-vendeve apo territoreve;
• masat tarifore preferenciale, të miratuara në mënyrë të njëanshme nga Republika e Shqipërisë për sa u përket disa vendeve ose territoreve jashtë territorit doganor të Republikës së Shqipërisë, ose disa grup-vendeve apo territoreve;
• masat autonome që parashikojnë një reduktim ose përjashtim nga detyrimet doganore për mallra të caktuara;
• trajtimin tarifor favorizues të specifikuar për mallra të caktuara, për shkak të natyrës apo përdorimit të tyre të veçantë përfundimtar (end-use), në kuadër të masave të përmendura nga shkronja “c” deri në “dh” ose “ë”;
• masa të tjera tarifore, të parashikuara nga legjislacioni bujqësor apo tregtar, ose çdo legjislacion tjetër i Republikës së Shqipërisë.