Botohet Libri Jeshil, “Doganat 2021 dhe Përparësitë 2022” (Publikuar dt. 20/04/2022)

Drejtoria e Përgjithshme e Doganave ka botuar për herë të parë në historinë e saj, “Librin Jeshil”, në formatin e një Raporti Vjetor, “Doganat 2021 dhe Përparësitë 2022”, në dy gjuhë, shqip dhe anglisht.

Ideja e “Librit Jeshil” është në vizionin e Administratës Doganore Shqiptare për lehtësimin e tregtisë së ligjshme nëpërmjet “kanalit jeshil”, por duke ruajtur ekuilibrin e duhur me ushtrimin e kontrolleve doganore.

Libri paraqet një pasqyrë të detajuar të performancës së Doganave në mbledhjen e të ardhurave (të cilat për vitin 2021 shënuan një rekord historik), si dhe të realizimit të disa prej prioriteteve tona kryesore mbi lehtësimin e procedurave doganore dhe të tregtisë, certifikimin për herë të parë të 8 (tetë) Operatorëve Ekonomikë të Autorizuar, funksionimin e korridoreve të gjelbra të CEFTA, nismës së Ballkanit të Hapur dhe digjitalizimin e shërbimeve për biznesin dhe individët.

Gjithashtu, Libri Jeshil, përmban statistika të detajuara mbi zbatimin e legjislacionit dhe kontrollet doganore (përfshirë ato aposterior) si dhe informacione mbi bashkëpunimin ndërkombëtar dhe integrimin evropian.

Një vend të posaçëm kanë zënë raportet me Organizatën Botërore të Doganave, DG Taxud, CEFTA, SHBA, Britanisë së Madhe, Itali, Francë që kanë asistuar me ekspertizë Administratën Doganore si dhe autoritetet doganore partnere.

Për herë të parë Administrata Doganore publikon edhe prioritetet kryesore për vitin në vijim 2022 me objektivat strategjikë dhe afate konkrete në funksion të:

(i)                 Lehtësimit të tregtisë,
(ii)               Rritjes së efektshmërisë së kontrollit doganor,
(iii)             Analizës së riskut dhe forcimit të mbikëqyrjes së produkteve të akcizës,
(iv)             Rritjes së të ardhurave dhe
(v)               Intensifikimit të bashkëpunimit me partnerët kryesorë dhe përafrimit me standardet e Bashkimit Evropian nëpërmjet programit të Ri të mbështetjes “Dogana 2021-2027”.

https://dogana.gov.al/dokument/3916/raporti-vjetor-2021-alb