Doganë-Polici firmosin Urdhër të përbashkët kundër trafiqeve dhe kontrabandës (Publikuar dt. 14/04/2022)

Drejtori i Përgjithshëm i Doganave, Genti Gazheli, dhe  Drejtori i Përgjithshëm  i Policisë së Shtetit , Gledis Nano, nënshkruan  Urdhërin e përbashkët për bashkëpunimin e veprimeve mes autoriteteve doganore dhe strukturave të policisë.

Gazheli dhe Nano vlerësuan bashkëpunimin e frytshëm midis strukturave që ata drejtojnë, në angazhimin dhe përdorimin optimal të burimeve njerëzore, teknike dhe buxhetore, me qëllim krijimin e lehtësirave ligjore për qarkullimin e shtetasve dhe të mallrave. Modeli i bashkëpunimit dhe i funksionimit të Task Forcës permanente dhe rezultatet e arrira, në Portin e Durrësit dhe në Rinas, janë shumë inkurajuese për ta forcuar akoma edhe më shumë këtë bashkëpunim.  

Kreu i Doganave  Gazheli theksoi se  “Urdhri i Përbashkët për bashkëpunim mes autoriteteve doganore dhe autoriteteve të Policisë, është shprehje e vullnetit për të bashkërenduar veprimtarinë tonë, mbështetur në Kodin Doganor dhe ligjin “Për Kontrollin Kufitar”. Objektivi kryesor i Urdhrit është themelimi i bashkëpunimit dhe forcimi i mbikëqyrjes, si dhe kontrolli gjatë procedurave të hyrje-daljeve të shtetasve dhe mjeteve shqiptare dhe të huaja në Pikat Doganore të Kalimit Kufitar.”

Ndërsa drejtori I Policisë së Shtetit, Nano vlerësoi se “bashkëpunimi ndërsektorial përbën themelin e menaxhimit të integruar të kufirit, që kërkon ndarje të koordinuar të punës, vendosjen e standardeve për bashkëpunim, promovimin e përdorimit të përbashkët të të gjitha kapaciteteve, kanalet e komunikimit dhe sinkronizimin e procedurave të punës. Ky bashkëpunim mundëson angazhimin dhe përdorimin optimal të burimeve njerëzore, teknike dhe buxhetore të të dy agjencive, me qëllim lehtësimin e qarkullimit legjitim të shtetasve dhe mallrave, përmirësimit të sigurisë kufitare, si dhe parandalimin dhe goditjen e krimit ndërkufitar. Rregullorja që do të miratojmë sot është fryt i një përpjekjeje të përbashkët, që ka si qëllim forcimin e mëtejshëm të bashkëpunimit, mbikëqyrjes, kontrollit kufitar dhe doganor gjatë procedurave të hyrje-daljeve të shtetasve, mjeteve e mallrave”, tha Nano.

Zbatimi i procedurave që parashikon Urdhri i Përbashkët do të monitorohet në mënyrë të integruar nga të dyja autoritetet nënshkruese.