Monitorimi i rritjes së çmimeve, Dogana do të jetë pjesë e Bordit të Transparencës për çmimet bazë (Publikuar dt. 17/03/2022)

Drejtori i Përgjithshëm i Doganave, Genti Gazheli, mori pjesë në takimin e organizuar nga Kryeministri Edi Rama dhe Ministrja e Financave dhe Ekonomisë, Delina Ibrahimaj, me përfaqësues të bizneseve furnizuese të ushqimeve.

Ky takim  erdhi si domosdoshmëri  pas rritjes së çmimeve që kanë pësuar gjithë produktet ushqimore, që pas nisjes së luftës Rusi-Ukrainë. 

Gjatë këtij takimi kreu i Qeverisë nënvizoi faktin se në këtë situatë kemi faktikisht detyrimin e përbashkët të gjithë ne si shqiptarë që të bëjmë secili të vetën, dhe se është shumë domethënëse që konsumi nuk ka rënë.

Drejtoria e Përgjithshme e Doganave do të jetë pjesë e Bordit të  Transparencës për Çmimet Bazë  që do të mblidhet ditën e nesërme menjëherë pas daljes së Aktit Normativ nga Këshilli i Ministrave.

Bordi do të vendosë për disa produkte specifike të shportës që kanë peshën më të madhe në konsumin e familjeve me të ardhura të ulëta si për orizin, miellin, qumështin, vajin, sheqerin.