Gazheli në Prishtinë: Lehtësimi i procedurave doganore do të rrisë shkëmbimet tregtare mes dy vendeve (Publikuar dt. 07/10/2021)

Administrata Doganore Shqiptare dhe ajo e Kosovës kanë një bashkëpunim shumë të mirë dhe të konsoliduar në të gjitha drejtimet dhe për të gjitha çështjet me interes dypalësh.

Drejtori i Përgjithshëm i Doganave Shqiptare, Genti Gazheli, zhvilloi një vizitë zyrtare në Doganën e Kosovës, ku u prit nga drejtori i Përgjithshëm, Agron Llugaliu . Kjo vizitë e kreut të Doganave shqiptare vjen në vijim të takimit të dy Kryeministrave të Shqipërisë dhe Kosovës, para pak ditësh në Prishtinë.

Gjatë këtij takimi, bashkëbiseduesit diskutuan mbi tema me interes dypalësh me qëllim përshpejtimin dhe lehtësimin e procedurave doganore në kalimin e mallrave në Morinë/Vërmicë dhe Durrës, procedurat e thjeshtësuara të ndërsjellta, sensibilizimi i opratorëve ekonomikë për këto procedura, mundësia e njohjes së ndërsjelltë të plumbosjes, si dhe sigurimi i prezencës së mundëshme të autoritetve kosovare në Porto Romano.

Shkëmbimet tregtare mes dy vendeve gjatë viteve të fundit janë rritur, ndërkohë që vetëm gjatë periudhës Janar- Gusht 2021 janë realizuar importe me vlerë prej 7,655 mln lekë, dhe në eksport janë realizuar 23,563 mln lekë.