Barazia gjinore, ADSH prioritet rritjen e përfaqësimit të grave (Publikuar dt. 25/09/2021)

Rritja e përfaqësimit të grave në strukturat doganore shqiptare po shihet me prioritet nga drejtuesit e Doganës Shqiptare.
Përfaqësuese të Doganës Shqiptare morën pjesë në forumin e parë me temë “Gratë në Dogana”, të organizuar nga Organizata Botërore e Doganave dhe Unioni Tatimor dhe Doganor (DG TAXUD) të Komisionit Europian.
Në këtë event, i cili u zhvillua online, morën pjesë rreth 200 përfaqësues nga Doganat e gjithë botës, ku shkëmbyen eksperiencat, ndanë pikëpamjet e tyre mbi rëndësinë e barazizë gjinore dhe përfshirjes së grave sa më shumë në vendimmarrje.
Organizata Boterore e Doganave së shpejti pritet të shpallë zyrtarisht "Rrjetin për Barazi Gjinore dhe Diversitet në Doganat", që synon të sigurojë një platformë të nivelit të lartë për shkëmbimin e përvojave frymezuese dhe të çojë përpara këtë agjendë për të arritur një doganë më gjithëpërfshirëse.
Në fjalën e tij përshëndetëse, Sekretari i Përgjithshëm i OBD-së, Dr. Kunio Mikuriya, vlerësoi se "promovimi i diversitetit dhe përfshirjes në vendin e punës inkurajon inovacionin dhe përmirëson performancën individuale dhe organizative, pasi njerëzit me prejardhje të ndryshme sjellin perspektiva dhe ide të ndryshme në tryezë," sikurse dhe shtoi, se "është një çështje e të drejtave të njeriut, zhvillimit të qëndrueshëm dhe mirëqenies."
Sipas statistikave që u paraqitën në forum 37 % është prezenca e femrave doganiere në shkallë globale, ndërsa raporti femra doganiere në nivele drejtuese është 26 % .
Dogana Shqiptare në lidhje me barazinë gjinore në administratën e saj ka një përqasje pozitive, ku aktualisht janë të punësuara 303 gra, ose 29 % e gjithë stafit.