Drejtori i Përgjithshëm i Doganave, Genti Gazheli, zhvilloi një takim zyrtar me Takada Mitsuyuki, Ambasador i Japonisë në Tiranë, ku diskutuan mbi marrëdhëniet shumë të mira të bashkëpunimit mes dy vendeve, kryesisht në kuadrin e anëtarësimit dhe aktiviteteve të përbashkëta me Organizatën Botërore të Doganave (WCO). (Publikuar dt. 22/07/2021)

Kreu i Doganave, Gazheli, vlerësoi se falë kontributit të drejtpërdrejtë të Qeverisë Japoneze në OBD, Administrata Doganore Shqiptare ka përfituar nga disa programe dhe bursa (kryesisht përmes Fondit të Bashkëpunimit Doganor të Japonisë (CCF Japan) që synojnë të investojnë në menaxherë të mesëm me potencial të lartë dhe të zgjerojnë mundësitë e tyre, aftësi dhe njohuri, për të marrë pjesë në mënyrë aktive në procesin e reformimit dhe modernizimit të administratës doganore.
Pjesëmarrja e disa zyrtarëve të ADSH në këto programe ka bërë të mundur, jo vetëm thellimin e njohurive, por edhe krijimin e një rrjeti me vetë WCO-në.
" Bashkëpunimi ynë në të dy dimensionet, në mënyrë dypalëshe midis dy administratave doganore dhe nën WCO në shkëmbimin e informacioneve, trajnimeve, teknike dhe logjistike etj, ka bërë që të rriten kapacitetet, aftësitë dhe njohuritë e tyre për të marrë pjesë në mënyrë aktive në procesin e reformës dhe modernizimit të administratës",u shpreh Gazheli gjatë këtij takimi.
Shkëmbimet tregtare me Japoninë për vitin 2020, ishin 9 336 ton, me një vlerë prej 3 325 milion lekë ose 27 milion euro.