Gazheli: Të forcojmë bashkëpunimin rajonal në luftën kundër trafiqeve të paligjshme (Publikuar dt. 24/06/2021)

Drejtori i Përgjithshëm i Doganave, Genti Gazheli, mori pjesë në takimin e 13-të të Iniciativës së Kufirit Jugor (SBI), mbështetur nga Ambasada USA në Tiranë përmes programit të saj për Kontrollin e Eksportit dhe Sigurimin e Kufijve (EXBS).

Gjatë këtij takimi u fol rreth bashkëpunimit ndërkufitar i cili synon t’u japë përgjigje sfidave të përbashkëta që vendet e rajonit duhet të përballen përgjatë kufijve të Shqipërisë, Kosovës, Malit të Zi dhe Maqedonisë së Veriut.

Programi u krijua në 2017 si një nevojë për të përmirësuar shkëmbimin e informacionit për luftën e krimit ndërkufitar si dhe bashkëpunimin e qëndrueshëm midis agjencive të zbatimit të ligjit kufitar duke qenë në themel të kësaj Iniciative.

Takimi i 13-të i SBI ishte një hap tjetër përpara në nxitjen e bashkëpunimit të mirë, i cili synon parandalimin dhe adresimin e krimit ndërkufitar, si dhe krijimin e standardeve për lehtësimin e tregtisë.