Gazheli: Lehtësimi i procedurave dhe njohja rajonale e OEA-ve, do rrisë shkëmbimet tregtare mes vendeve të CEFTA (Publikuar dt. 28/05/2021)

Drejtori i Përgjithshëm i Doganave, Genti Gazheli, zhviloi një takim me Emir Djikic, drejtorin e Sekretariatit të CEFTA-s, Marrëveshjes për Tregtinë e Lirë në Europën Juglindore, ku diskutuan mbi lehtësitë doganore që  duhet t’ju krijohen bizneseve të vendeve të kësaj nisme.  

Kreu i Autoritetit Doganor shprehu mbështetjen dhe angazhimin e institucionit që ai drejton, mbi njohjen reciproke e Operatorëve Ekonomik të Autorizuar midis vendeve anëtare të CEFTA-s, cka do të thotë një lehtësim procedurash doganore për bizneset që kanë marrë këtë certifikim.  

Zoti Gazheli e njohu zyrtarin e CEFTA, se Administrata Doganore Shqiptare ka krijuar një strukturë të posacme  për OEA-të dhe lehtësirat doganore.

Në këtë kuadër vazhdon fushata e sensibilizimit për nxitjen e biznesit për të aplikuar dhe përfituar nga lehtësirat doganore, ndërkohë  që janë  certifikuar katër OEA.

Sipas Gazhelit, krijimi i një klime të favorshme për biznesin, të cilin e konsideron motor të  zhvillimit ekonomik të vendit, për  qeverinë shqiptare  është prioritet. Në këtë këndvështrim, u shpreh drejtori përgjithshëm, bashkepunimi dhe  shkëmbimi i informacionit si dhe njohja reciproke e OEA-ve  midis vendeve anëtare të CEFTA-s sjell lehtësi për bizneset që zhvillojnë aktivitetin e tyre ekonomik në eksport/import dhe rritje ekonomike për vendet e rajonit.