Gazheli takim me Muçostepën: Të thjeshtojmë procedurat në ndihmë të biznesit (Publikuar dt. 29/12/2020)

Drejtori i Përgjithshëm i Doganave, Genti Gazheli, zhvilloi një takim me Kryetaren e Bashkimit të Dhomave të Tregtisë dhe Industrisë, Ines Muçostepa, ku diskutuam mbi krijimin e një klime sa më të favorshme për biznesin.

Gjatë këtij takimi bashkëbiseduesit ranë dakort për  të rritur bashkëpunimin midis dy institucioneve, si dhe për lehtësimin e procedurave doganore për sipërmarrjet.

Zoti Gazheli e informoi përfaqësuesen e biznesit mbi mundësitë që ka sipërmarrja vendase dhe e huaj që zhvillon aktivitetin ekonomik në Shqipëri, për të aplikuar për statusin e Operatorit Ekonomik  të Autorizuar, si një mundësi shumë e mirë për to në thjeshtimin dhe lehtësimin e procedurave në të gjitha pikat doganore.

Një ndër lehtësitë që po e ndien biznesi tashmë është “dogana pa letra”, procedurë e cila ka bërë që pjesa më e madhe e tyre të mos paraqiten fizikisht në doganë.

Gjithashtu në takim u ra dakort që gjatë vitit të ardhshëm të organizohen evente dhe takime të përbashkëta informuese për biznesin, mbi aksesin, trajtimin më të favorshëm  që mund të kënë sipërmarrjet mbi procedurat.