Dogana sekuestron mbi 1 milion paketa cigare në Portin e Durrësit (Publikuar dt. 21/10/2020)

Strukturat e Administratës Doganore kanë sekuestruar një sasi prej  më shumë se 1 milion paketa cigare në Portin e Durrësit.

Drejtori i Përgjithshëm i Doganës, Genti Gazheli, gjatë një deklarate për mediat, bëri të ditur,  se nëse ky mall do të hidhej në treg, vlera e paketave të duhanit të sekuestruar në të dy kontenierët, sipas të dhënave të disponueshme, mbi të cilat janë llogaritur detyrimet doganore, kap shifrën e 168 000 euro.(Ndërsa detyrimi doganor që duhej të paguhej kap shifrën 164 168 928 lekë).

Më poshtë deklarata e plotë e  Drejtorit të Përgjithshëm të Doganës, Genti Gazheli-

Përshendetje të gjithëve,

Strukturat e Administratës Doganore kanë sekuestruar një sasi prej  më shumë se 1 milion paketa cigare në Portin e Durrësit.

Pas një analize risku dhe dyshimeve të arsyeshme, mbi të dhënat e dokumentacionit shoqërues të ngarkesës, strukturat doganore ushtruan kontroll në dy kontenierë të dyshuar, ku rezultoi ngarkesë prej 1.050.000 paketa cigare të markëve “Deal Red” , “Deal Blue”, “GT Smart Red”, “GT Smart Blue”, “Mile Red” dhe “Mile Blue” , me origjinë nga India.

Vlerësoj se kjo është dhe në sajë të një bashkëpunimi dhe shkëmbimi informacioni në kohë reale me partnerët ndërkombëtarë.

E gjithë ngarkesa me cigare ishte e papajisur me pullë fiskale të Shqipërisë apo të ndonjë vendi tjetër.

Nëse ky mall do të hidhej në treg, vlera e paketave të duhanit të sekuestruar në të dy kontenieret, sipas të dhënave të disponueshme, mbi të cilat janë llogaritur detyrimet doganore, kap shifrën e 168 000 euro.(Ndërsa detyrimi doganor që duhej të paguhej kap shifrën 164 168 928 lekë)

E gjithë sasia u sekuestrua dhe rasti u referua në Prokurorinë pranë Gjykatës së Shkallës së Parë Durrës, për veprën penale, "Kontrabandë me mallra që paguajnë akcizë ose me pezullim të plotë apo të pjesshëm nga detyrimet doganore ose të akcizës" dhe “ falsifikimi i vulave, stampave ose i formularëve” të parashikuar nga neni 172 dhe 190/3 të Kodit Penal.

Në bashkëpunim me Prokurorinë pranë Gjykatës së Shkallës së Parë Durrës, po kryhen veprimet e mëtejshme hetimore.

Ky nuk është rasti i parë i kohëve të fundit që kapen mallra kontrabandë, sidomos për mallrat e akcizës.

Më lejoni që në këtë dalje të parë timen në pozicionin e  Drejtorit të Përgjithshëm të Doganave, të përcjell  një mesazh për të gjithë qytetarët dhe operatorët ekonomikë, se Strukturat e Administratës Doganore do vijojnë të jenë të angazhuara tërësisht në zbatimin e detyrave funksionale që kanë. Objektivi ynë është tolerancë zero ndaj çdo akti të paligjshëm dhe trafiqeve.

Çdo punonjës i Administratës Doganore do të jetë në shërbim për të krijuar lehtësi  dhe një klime të favorshme  për sipërmarrjen, si dhe në funksion të konkurrencës së ndershme dhe barazisë para ligjit.

Faleminderit