Bardhi: Bashkëveprimi i institucioneve, domosdoshmëri për sigurinë e vendit (Publikuar dt. 06/02/2020)

-Përurohet Zyra e Njësisë për Kontrollin e Kargove Ajrore në Rinas

Drejtori i Përgjithshëm i Doganave, Gjon Bardhi, mori pjesë në ceremoninë e përurimit të zyrës së Njësisë për Kontrollin e Kargove Ajrore, organizuar në Aeroportin e Rinasit. Të pranishëm në këtë ceremoni ishin Zv.Ministre e Brendshme, Rovena Voda dhe Drejtori i Përgjithshëm i Policisë së Shtetit, Ardi Veliu.
Kreu i Doganave vlerësoi projektin për Kontrollin e Kargos në Aeroportin e Rinasit i ofruar nga ana e Zyrës së Kombeve të Bashkuara për Drogën dhe Krimet, si një nevojë për t’ju përgjigjur në mënyrë sa më eficente rreziqeve të ndryshme me të cilat përballet siguria e aeroportit në ditët e sotme, por edhe si një parapërgatitje për rrisqet që mund të vijnë duke u shtuar, diversifikuar dhe sofistikuar në të ardhmen.
" Jemi të gjithë të vetëdijshëm se për të qënë efektivë në nivelin që tashmë kërkohet, na duhet një bashkëveprim i mirorganizuar i institucioneve tona. Kjo do jetë një ndihmë e madhe për sigurinë e vendit, bashkëpunimin më partnerët ndërkombëtarë, komunitetin e biznesit, por edhe për qytetarët.Kontributi ynë si Administratë Doganore mendoj se do të jetë kyc dhe i një roli vendimtar në implementimin sa më korrekt të një Projekti të tillë", u shpreh Bardhi.
Transporti ajror po përdoret gjithënjë e më shumë si në rang ndërkombëtar ashtu edhe në atë kombëtar, sepse paraqet avantazhe të mëdha në plotësimin e nevojave të bizneseve për produkte në kohë sa më të shkurtër. Kryesisht këtu zënë vend ajo kategori produktesh me vlerë të lartë dhe peshë të vogël. Një fenomen i tillë vihet re edhe sa i takon Aeroportit të Rinasit ku numri i linjave ajrore dhe numri i pasagjerëve që udhëtojnë nëpërmjet këtij aeroporti vjen duke u rritur nga viti në vit. Po ashtu pritshmëritë për në të ardhmen janë akoma më të larta.
Kreu i Doganave theksoi, se rritja e volumit në transportin ajror, shoqërohet edhe me sofistikimin e metodave të fshehjes apo ndryshimit të rrugëve që ndiqen nga trafikantët, çka e bën shumë të vështirë reagimin me sukses të agjensive ligjzbatuese.
Sipas tij, një bashkëpunim më i mirë midis agjensive ligjzbatuese dhe operatorëve të tjerë është mëse i nevojshëm për të luftuar fenomenet e kundërligjshme. Po ashtu rritja e profesionalizmit dhe efektivitetit në luftën kundër trafiqeve të ndryshme apo shkeljeve të ndryshme ligjore, ndihmon drejtpërdrejt në përmbushjen e misionit që kanë autoritetet doganore për lehtësimin e tregtisë së ligjshme.
"Shkëmbimi në kohë reale i informacionit, nëpërmjet platformave dhe instrumentave të teknologjisë dhe informacionit do të përmirësojë ndjeshëm menaxhimin e riskut, si dhe do të na bëjë më të fortë në drejtim të luftës së përbashkët ndaj fenomeneve që shqetësojnë jo vetëm vendin tonë si terrorizmi, pastrimi i parave, lufta kundër trafikut të mallrave të ndaluara, kontrabanda dhe tregtia ilegale dhe ndërkohë do të rriste besueshmërinë e atyre që duan të zhvillojnë tregtinë e pastër dhe të ndershme", tha Bardhi gjatë kësaj ceremonie.
Zbatimi i Projektit për Kontrollin e Kargos në Aeroportin e Rinasit, i ofruar nga ana e Zyrës së Kombeve të Bashkuara për Drogën dhe Krimet, por edhe mbështetjen e OBD-së , Qeverisë Gjermane dhe Franceze, bëhet nga disa agjensi ligjzbatuese shtetërore dhe private si TIA, Policia, Shërbimi sekret, Dogana, AACA, etj.