Lançohet shërbimi më i ri në sistemin doganor shqiptar, “Dogana pa letër” (Publikuar dt. 22/05/2019)

Lançohet shërbimi më i ri në sistemin doganor shqiptar, “Dogana pa letër”, i cili jo vetëm rrit cilësinë e shërbimit ndaj biznesit, por ul kosto dhe kohë për sipërmarrjet që zhvillojnë aktivitetin ekonomik të tyre në import-eksport.

Ministrja e Financave dhe Ekonomisë, Anila Denaj, i shoqëruar nga Drejtori i Përgjithshëm i Doganave, Arlind Gjokuta,  zhvilloi një vizitë në degën Doganore, Tiranë, ku pa nga afër gjithë proçesin e zhvillimit të shërbimit më të ri online për bizneset “Dogana pa letra”. Ky proces është  ndërmarrë në kuadër të lehtësimit të procedurave dhe shërbimit ndaj biznesit, detyrim që rrjedh edhe nga Kodi Doganor i miratuar në vitin 2014.

Ky shërbim, i cili ka nisur të funksionojë që nga data 16 Maj, u heq bizneseve detyrimin për tu paraqitur në sportelet doganore fizikisht për depozitimin e deklaratës doganore, pasi tashmë deklarata doganore mund të paraqitet vetëm në mënyrë elektronike. Pra, deklarimi i mallrave në doganë bëhet vetëm online (pa letra) duke aplikuar nënshkrimin elektronik, pavarësisht vendit ku ndodhet deklaruesi dhe nëpërmjet vulosjes elektronike sigurohet, në kohë reale, kopja e këtij dokumenti e verifikuar nga autoritetet doganore.

Ministrja Anila Denaj tha se nga ky shërbim i ri online do të përfitojnë rreth 93 % e bizneseve, të cilët deri më tani detyroheshin të paraqiteshin edhe fizikisht në sportelet doganore për depozitimin e deklaratës doganore. Vetëm operatorët të cilët klasifikohen me risk të lartë, në gjuhën doganore me “kanal të kuq”, që përbëjnë një përqindje të vogël të operatorëve ekonomikë që depozitojnë deklarata doganore, janë ata të cilët i nënshtrohen një kontrolli të plotë me të gjithë letrat, ndërsa pjesa tjetër jo.

“Ne sot po lançojmë këtë projekt, i cili në benefit të gjithë operatorëve është i ndjeshëm pasi 93 % do ta kenë procesin pa asnjë kontakt fizik dhe kohë optimale procesimi, dhe në bazë të matricës së riskut të gjithë operatorët të cilët klasifikohen me risk më të lartë, në gjuhën doganore me “kanal të kuq”, janë ata të cilët i nënshtrohen një kontrolli të plotë me të gjithë letrat, të gjithë të tjerë jo. Ky grup i “kanalit të kuq” përfaqëson në bazë të riskut dhe eksperiencës aktuale mesatarisht 7 % të operatorëve dhe në këtë rast, e gjithë pjesa tjetër sot kalon pa asnjë kohë procesimi në kontrolle, por edhe në letra, pasi edhe agjencitë doganore janë të unifikuara me këtë shërbim, me “signature” dhe me të gjithë letrat të unifikuara me sistemet tona”, u shpreh znj. Denaj.

Ministrja vuri në dukje se me këtë shërbim të ri online doganor për bizneset Shqipëria bëhet vendi i parë në rajon që e ofron.

“Sigurisht na bën krenarë që të jemi avangardë në rajon dhe absolutisht të shkojmë drejt përafrimeve të aspekteve të tjera juridike të munguara në fusha të tjera, jo vetëm të Kodit Doganor. Kodi Doganor i miratuar  në Parlament në vitin 2014 është zanafilla e gjithë këtij procesi. Përafrimi i ligjit dhe Kodit Doganor me 100 % ligjin e BE-së ka qenë baza për të bërë këto investime, por njëkohësisht për të vendosur theksin të objektivi që duam të arrijmë: së pari, rrugëtimi drejt Bashkimit Europian me të gjithë reformat dhe angazhimet që qeveria ka ndërmarrë dhe po zbaton, por edhe me fakte konkrete në procedura të cilat që sot, përtej këtij rrugëtimi, janë në dispozicion të gjithë operatorëve”, u shpreh Ministrja.

Nga ana e tij, Drejtori i Përgjithshëm i Doganave Shqiptare, Arlind Gjokuta e konsideroi këtë si një moment historik për doganën shqiptare, pasi shkurton ndjeshëm kohën e pritjes së bizneseve në doganë, ul kostot e tyre, si dhe minimizon kontaktin ndërmjet biznesit dhe doganës, duke indikuar në mënyrë indirekte dhe në reduktimin e fenomeve korruptive.

Sipas Gjokutës, “Dogana pa letër” është një proçes shumë ambicioz i Administratës Doganore Shqiptare tashmë i bërë realitet . Realizimi i këtij proçesi përpara afateve të parashikuara (2021) e ka vendosur Administratën Doganore ndër strukturat më të informatizuara në vend dhe pararojë me administratat doganore të rajonit.

Kreu i Doganave, u shpreh se hapi tjetër më i rëndësishëm është që brenda këtij viti synojmë të vendosim dhe traun elektronik. Pra, pas printimit të kësaj deklarate ose pas marrjes së deklaratës, e cila është tërësisht në formë elektronike nëpërmjet një bar kodi dhe elementëve të tjerë të sigurisë që do të jenë totalisht elektronike, të eleminohet ai që quhet si “doganieri i traut”, duke qenë se thjesht nëpërmjet një smart phone do të bëhët e mundur që, nëse deklarata është çliruar ashtu siç duhet dhe janë paguar të gjithë detyrimet, do të bëhet e mundur dhe hapja e traut.

Ka një plan të qeverisë shqiptare, të Ministrisë së Financave, për informatizimin e doganës, që imponohet nga miratimi i Kodit Doganor në vitin 2014, i cili duhet thënë që në rajon jemi i vetmi vend që ka një Kod me këto standarde, dhe ky Kod Doganor imponon zhvillimin e teknologjisë së informacionit në dogana dhe komunikimit ndërmjet doganës dhe gjithë agjencive do të kryhet e gjitha vetëm online.