Shqipëri-Francë: Rritet bashkëpunimi në fushën e Doganave (Publikuar dt. 17/04/2019)

Doganat Franceze premtojnë rritje të bashkëpunimit  në fushën e shkëmbimit të informacioneve dhe të eksperiencave për të përmirësuar punën e Administratës Doganore Shqiptare.  

Drejtori i Përgjithshëm i Doganave,  zoti Arlind Gjokuta,  priti në një takim zyrtar, zotin Julien Autret, Atashe Doganor në Ambasadën e Francës, në Sofje, që mbulon dhe Shqipërinë, i cili shoqërohej nga Ambasadorja e Francës  në vendin tonë, zonja Christina Vasak.

Gjatë këtij takimi bashkëbiseduesit ndanë mendimin se rritja e bashkëpunimit sidomos në shkëmbimin e informacioneve do të ndikojë shumë në sigurinë e dy vendeve tona.

Drejtori i Doganave Shqiptare, Gjokuta evidentoi sukseset e arritura falë  dhe asistencës së ndërsjelltë në luftën  kundër trafiqeve të paligjshme e veçanërisht kundër trafikut të lëndëve narkotike dhe prekursorëve.

Ndërsa Ambasadorja Vasak shprehu gadishmërinë për zgjerimin e mëtejshëm të bashkëpunimit dhe në veçanti në luftën kundër pastrimit të parave, dhe kontrollit të flukseve të parasë fizike që kalon në kufi, ku Dogana, sipas saj, luan një rol  shumë të rëndësishëm dhe ku do të përqëndrohet ndër të tjera asistenca franceze.

Diskutimet vazhduan më pas në një tavolinë teknike,  ku u analizua asistenca franceze e deritanishme,  si dhe u planifikuan veprimtaritë e mëtejshme.

Ambasada Franceze dhe Doganat Franceze  në vite kanë suportuar Doganat Shqiptare, si në kuadër të projekteve IPA,  ashtu dhe në planin bilateral.