Lehtësimi i Tregtisë, Ikonomi fton biznesin të aplikojë për statusin AEO (Publikuar dt. 21/03/2019)

Komiteti Kombëtar i Lehtësimit të Tregtisë zhvilloi takimin e parë për vitin 2019 me aktorët institucionalë dhe përfaqësuesit e bizneseve, ku u diskutua mbi potencialet e lehtësimit të tregtisë për operatorët në vend.  E Pranishme në këtë takim,  Ministrja e Financave dhe Ekonomisë,  Anlila Denaj, u shpreh gjatë fjalës hapëse se roli i Komitetit për vitin 2019 është i një rëndësie të veçantë, pasi prej Janarit të vitit 2019 Ministria e Financave dhe Ekonomisë drejton Marrëveshjen për Tregtinë e Lirë në Evropën Qendrore (CEFTA).

Ministrja ftoi aktorët pjesëmarrës në këtë komitet për sugjerime mbi zbatimin e suksesshëm të protokolleve të kësaj marrëveshjeje në kuadër të lehtësimit të  tregtisë, si edhe mbi hapat e mëtejshëm në kuadër të realizimit të Programit të Operatorëve Ekonomikë, si një nga prioritetet e vitit 2019.

Drejtore e Përgjithshme e Doganave, Belinda Ikonomi,  informoi  përfaqësuesit e biznesit mbi procesin e përfitimit të statusit të Operatorit Ekonomik të Autorizuar, AEO.  Sipas Ikonomit, deri tani kanë aplikuar dy biznese për  të marrë stausin e AEO-ve, ndërkohë që  statusin e zhdoganuesit local e kanë përfituar tashmë nëntë biznese, si një hap paraprak drejt atij të AEO-së.

 Marrja e këtij statusi do tu lehtësojë atyre mjaft procedura doganore brenda dhe jashtë vendit, pasi krijon akses të  mëtejshëm në tregjet rajonale dhe europiane për këto sipërmarrje.

Instituti i Politikave Publike dhe Private, me mbështetjen e GIZ,  prezantoi studimin mbi përfitimet që ka sipërmarrja që merr statusin e Operatorit  Ekonomik të Autorizuar.