Dita Ndërkombëtare e Doganës (Publikuar dt. 30/01/2019)

Autoritetet doganore kanë si mision kryesor mbikëqyrjen e tregtisë ndërkombëtare të Republikës së Shqipërisë, duke kontribuar për tregtinë e hapur e të drejtë në zbatim të politikave tregtare dhe atyre të sektorëve të tjerë të ekonomisë shqiptare, që ndikojnë në tregti dhe në sigurinë e të gjithë zinxhirit tregtar.

Tradicionalisht, për të shënuar Ditën Ndërkombëtare të Doganave (ICD) çdo vit, Sekretariati i OBD-së kushton një temë që është e rëndësishme për sfidat me të cilat ballafaqohet bashkësia doganore globale. Slogani i zgjedhur për vitin 2019 është "Kufi  inteligjent për tregti, udhëtime dhe transport pa pengesa".

Me rastin e Ditës  Ndërkombëtare të Doganave,  Administrata Doganore Shqiptare  zhvilloi një ceremoni  ku në emër të OBD vlerësoi  me “Certifikata  Merite”, disa  punonjës  për rritje të cilësisë  në ofrimin e  shërbimeve  doganore ndaj biznesit dhe qytetarëve.

Historik…

Në kalendarin e festave ndërkombëtare, data 26 janar, llogaritet si “Dita Ndërkombëtare e Doganave”. Organizata Botërore e Doganave është e vetmja organizatë ndërqeveritare e fokusuar ekskluzivisht në çështjet doganore.  Historia e OBD-së fillon që në vitin 1947 kur 13 qeveri evropiane themeluan Grupin Studimor për të krijuar një ose më shumë Unione Doganore Ndër Evropiane, i cili pas shumë vitesh aktivitet dhe pas anëtarësimit në të, të shumë shteteve, në vitin 1994 e ndërroi emrin në Organizata Botërore e Doganave.

Tashmë OBD është zëri i 179 administratave doganore, që operojnë në të gjithë kontinentet, ¾ e të cilave janë vende në zhvillim. Anëtarët e OBD-së janë përgjegjës për kryerjen e 98% të tregtisë ndërkombëtare.

Shqipëria është anëtare e OBD-së që prej gushtit 1992, dhe që prej asaj kohe merr pjesë aktivisht në takimet e Këshillit të OBD-së, komiteteve dhe nën komiteteve, duke përfituar nga eksperiencat më të mira të vendeve të zhvilluara dhe duke i implementuar ato në sistemin tonë doganor.