Investimet rrisin përmirësimin e shërbimeve doganore -Inagurohen mjediset e reja në Pikën e Kalimit Kufitar në Han të Hotit (Publikuar dt. 03/08/2018)

Rritja e investimeve në Pikat e Kalimit Kufitar ka përmirësuar ndjeshëm  shërbimin ndaj qytetarëve dhe bizneseve. Pika kufitare e Hanit të Hotit është transformuar rrënjësisht, duke mundësuar hapësira me moderne për të gjithë ata që kalojnë kufirin nga Shqipëria në Malin e Zi, dhe anasjelltas. Në këtë pikë kufitare  aktualisht qytetarët dhe bizneset përfitojnë shërbime shumë herë më të shpejta e cilësore krahasuar me disa vite më parë.

Në një ceremoni të zhvilluar në Pikën Kufitare të Hanit të Hotit, janë përuruar ambientet e reja të kësaj Pike të Kalimit Kufitar, në mbyllje të një projekti të menaxhuar nga BE, që shkon afër 1.8 milion euro.

Të pranishëm ishin zyrtarë të lartë të Qeverive të Shqipërisë dhe Malit të Zi,  zyrtarë të Administratës Doganore Shqiptare dhe Policisë së Shtetit, si dhe Ambasadore e Delegacionit të BE-së, në Tiranë, Romana Vlahutin .

Realizimi i këtij investimi bën të mundur një kontroll kufitar më të shpejtë dhe të sigurtë në aksin kryesor midis Shqipërisë dhe Malit të Zi, për trafikun kufitar dhe transportin e mallrave. Për  Administratën Doganore,  ky investim siguron mundësinë e hapësirës së mjaftueshme për kamionet e parkuar në të dy krahet (hyrje dhe dalje).  Gjithashtu bën të mundur përpunimin në kohë më të shkurtër të kamioneve me mallra dhe lehtëson ndjeshëm procedurat doganore, si dhe facilitete të tjera për kontrolle të përbashkëta të Policise Kufitare dhe Doganes, ashtu si edhe facilitete për kontrollet veterinare dhe fitosanitare (AKU).