Shqipëri-Kosovë: Lehtësohen procedurat për qytetarët dhe biznesin. Përurohen mjediset e reja në Pikën e Kalimit Kufitar të Morinës. (Publikuar dt. 24/07/2018)

Lëvizja e njerëzve  dhe e mallrave tashme do të jetë më e shpejtë dhe më e lehte në Pikën Kufitare të Morinës.
Në një ceremoni të zhvilluar në Morinë të Kukësit, janë përuruar ambientet e reja të kësaj Pike të Kalimit Kufitar, në mbyllje të një projekti të menaxhuar nga BE, që shkon afër 1 milion euro.
Të pranishëm ishin zyrtarë të lartë të Qeverive të Shqipërisë dhe Kosovës, zyrtarë të Doganave dhe Policive, si dhe ambasadorë të vendeve të BE-së të akredituar në Tiranë e Prishtinë.
Tashmë modernizimi i pajisjeve dhe ambientet e reja janë në funksion  të plote të lehtësimit të kalimit të shtetasve në të dy anët e kufirit, si dhe të qarkullimit të mallrave. Gjithashtu janë plotësuar ambientet e punës për autoritetet përgjegjëse për menaxhimin e kufirit, migracionit, doganat,  kontrollet veterinare dhe fitosanitare.
Këto ndryshime bëjnë të mundur  lehtësimin së tepërmi edhe të transportit te mallrave në këtë pikë kalimi të kufirit, pasi mjetet do të procesohen në një pikë të vetme të përbashkët.
Në këto objekte do të akomodohen specifikisht administrata e Doganës Shqiptare dhe asaj të Kosovës si dhe Policia Shqiptare dhe ajo e Kosovës.
Këtij financimi i është shtuar edhe financimi i Qeverisë Shqiptare, nëpërmjet Drejtorisë së Përgjithshme të Doganave për ndërtimin e Terminalit të autobusëve, Godina e inspektimit (kontrolli i vijës së dytë), Godina e Inceneratorit (për mallrat e ndaluara nga AKU) dhe punime të jashtme duke kompletuar kështu projektin e plotë të Pikës së  Kalimi Kufitar.
Duke përmirësuar infrastrukturën dhe shërbimet në këtë Pikë të rëndësishme të kalimit të kufirit kontribuohet në përmirësimin e menaxhimit të kufirit në përputhje me standartet e BE-së, veçanërisht në lidhje me standartet Schengen.