Zhvillohet në Tiranë takimi i dytë Rajonal i Drejtorëve të Doganave (Publikuar dt. 12/06/2018)

- Heqja e barrierave burokratike rrit shkëmbimet tregtare në Rajon

Administrata  Doganore Shqiptare organizoi  Takimin Rajonal Informal të 2-të të Nivelit të Lartë të Drejtorëve të Përgjithshëm të Administratave Doganore të Vendeve të Ballkanit Perëndimor,  në Tiranë.

Gjatë punimeve të kësaj konference rajonale,  krerët e  administratave doganore të vendeve të Ballkanit Perëndimor,  diskutuan mbi  gjetjen e mekanizmave të rinj që do të çojnë në lehtësimin e shkëmbimeve tregtare mes vendeve të rajonit .

I pranishëm në aktivitet  Ministri i Financave dhe Ekonomisë, zoti Arben Ahmetaj,  e vuri theksin te nevoja për heqjen e tarifave, të cilat kthehen në pengesa për shkëmbimet tregtare. Ai u bëri apel vendeve të rajonit për njohjen në mënyrë unilaterale të disa certifikatave. Këtu, sipas ministrit Ahmetaj, del si detyrë e administratave doganore të gjejnë të gjithë mekanizmat e duhur për të lehtësuar biznesin dhe për të ulur kohën për procedura në pikat doganore.

Ndërsa Drejtore e Përgjithshme e Doganave, Belinda Ikonomi, u shpreh, se shkëmbimi në kohë reale i informacionit, nëpërmjet platformave dhe instrumentave të teknologjisë dhe informacionit do të përmirësonte ndjeshëm menaxhimin e riskut, si dhe do të na bëjë më të fortë në drejtim të luftës së përbashkët ndaj fenomeneve që shqetësojnë rajonin si terrorizmi , pastrimi i parave, lufta kunder trafikut të mallrave të ndaluara, kontrabanda dhe tregtia ilegale. Kjo sipas Ikonomit,  do të rrisë besueshmerinë e atyre që duan të zhvillojnë tregtinë e pastër dhe të ndershme.

Takimi I Drejtoreve të Përgjithshëm të Doganave të Rajonit u mbështet nga USAID, IFC(pjesë e Bankës Botërore) dhe HMRC(Shërbimi Doganor I Mbretërisë së Bashkuar).

Takimi i Tiranës vjen si vazhdimësi e Takimit Rajonal Informal të Nivelit të Lartë të Drejtorëve të Përgjithshëm të Administratave Doganore të gjashtë vendeve të Ballkanit Perëndimor (WB6) – që u organizua nga Drejtoria Doganore e Republikës së Maqedonisë më 1 Dhjetor 2017 në Shkup, takim i cili ishte pikënisje për bashkëpunimin e mëtejeshëm ndërmjet autoriteteve doganore të rajonit me qëllim lehtësimin e tregtisë.