Statusi i OEA-ve, biznesi duhet të përfitojë nga thjeshtimi i procedurave doganore (Publikuar dt. 30/05/2018)

Përfitimi i statusit të Operatorit Ekonomik të Autorizuar  është  një mundësi  më shumë  për sipërmarrjen për t’u integruar në  tregjet rajonale. Drejtoria e Përgjithshme e Doganave ka nisur një fushatë informuese  për komunitetin e biznesit në lidhje me OEA-të, Operatorët Ekonomike të Autorizuar.  Në këtë  kuadër drejtues dhe specialistë të Departamentit Teknik dhe të Procedurave kanë  zhvilluar takime të ndryshme me përfaqësues të komunitetit të biznesit, jo vetëm në Kryeqytet, por edhe në rrethe, për të  informuar mbi lehtësitë dhe përfitimet që mund të kenë ato sipërrmarrje që do të aplikojnë për të përfituar statusin e OEA-ve.

Nëndrejtore e Përgjithshme e Doganave, Mirela Meko, u shpreh gjatë këtyre takimeve, se dispozitat e reja ligjore për OEA-të lehtësojnë proçedurat doganore për operatorët ekonomik, ndërkohë  që për ta   ulen kostot dhe rritet siguria ligjore. “Ende nuk kemi aplikime nga ana e operatorëve ekonomik për marrjen e statusit OEA.  Aktualisht ka gjetur zbatim, si thjeshtim i rëndësishëm proçedura e thjeshtuar e zhdoganimit në ambientet e operatorit ekonomik ose sic njihet ndryshe, zhdoganimi lokal. Deri tani janë miratuar shtatë autorizime për “zhdoganim lokal” dhe këto operatorë janë një kontigjent mjaft I mirë për të  përfituar stausin e OEA”, theksoi Meko.

Gjatë  këtyre takimeve informuese, përfaqësuesit e Doganave janë mbështetur nga IFC, me asistencë teknike dhe ekspertë të huaj të njohur në këtë fushë.

Ndërkohë  tashmë  me plotesimin e  bazës ligjore është bërë e mundur  njohja  reciproke të programeve kombëtare OEA në të gjitha vendet e CEFTA-s (Shqipëri, Maqedoni, Mal i Zi, Serbi, Bosnjë dhe Hercegovina, Moldavia). Legjislacioni doganor lidhur me Operatorët Ekonomik të Autorizuar është i njëjtë me atë të BE-së.