Bashkëpunimi me biznesin, Doganat nënshkruajnë “Memorandum Bashkëpunimi” me Dhomën e Tregtisë së Tiranës (Publikuar dt. 28/05/2018)

Bashkëpunimi me biznesin dhe konsiderimi i  tij si një partner është shumë i rëndësishëm për Administratën Doganore Shqiptare. Drejtoresha e Përgjithshme e Doganave, Belinda Ikonomi, zhvilloi  një takim pune me komunitetin e biznesit që aderon pranë Dhomës së Tregtisë dhe Industrisë së Tiranës. Gjatë këtij takimi  kreu i Administratës Doganore Shqiptare i njohu përfaqësuesit e sipërmarrjes me  reformat që ka ndërmarrë kjo administratë për të krijuar një mjedis sa më të favorshëm për ta, kryesisht  në lehtësimin e procedurave. Zonja Ikonomi  iu bëri të ditur se janë zgjatur oraret e punës në degë të ndryshme doganore, ku në Qafë-Thanë dhe Morinë, shërbimi është 24 orë, çka do të thotë një lehtësi për biznesin, duke shmangur trafikun në procedurat e eksportit. Një ndër pikat më të rëndësishme, që zonja Ikonomi theksoi para biznesit, ishte ajo për  thirrjen që tashmë Doganat po bëjnë për aplikimin  dhe përfitimin e statusit të Operatorit Ekonomik të Autorizuar. Kështu të gjithë ato biznese që nuk kanë patur penalitete, janë kanalizuar te kanali Blu,  si dhe plotësojnë kriteret për një AEO, janë të ftuar të aplikojnë. Zonja Ikonomi iu bëri të qarta kriteret dhe përfitimet që ka një biznes që përfiton këtë status, jo vetëm në vend,  por dhe  në shkëmbimet tregtare me Rajonin. Gjithashtu u diskutuan një sërë temash të tjera të ngritura nga biznesi, si kontrollet fizike, cmimet e referencave, analiza e riskut apo dhe vlerësimi në qëndër i deklaratave doganore.

Nga ana e tij Kreu i Dhomës së Tregtisë dhe Industrisë së Tiranës, Nikolin Jaka,  falenderoi  drejtuesen e Administratës Doganore që në mënyrë teknike iu dha përgjigjje shqetësimeve të ngritura nga sipërmarrësit.

Në fund të takimit Drejtore e Përgjithshme e Doganave dhe kreu i biznesit kryeqytetas nënshkruan një “Memorandum Bashkëpunimi” midis dy institucioneve, i cili synon të rrisë shkëmbimet e informacionit sidomos në fushën e legjislacionit  dhe procedurave doganare.