Takim bilateral Shqipëri-Maqedoni: Rritet bashkëpunimi në fushën e Doganave (Publikuar dt. 06/04/2018)

Rritja e marrëdhënieve tregtare me vendet fqinje dhe lehtësimi i procedurave për bizneset reciproke, si dhe shkëmbimi I informacionit në kohë reale është shumë i  rëndësishëm për veprimtarinë e Administratës Doganore Shqiptare. Kjo u theksua gjatë  një takimi bilateral që  zhvilluan në qytetin e Korçës, Drejtore e Përgjithshme e Doganave, zonja Belinda Ikonomi, me Drejtorin e  Përgjithshëm të Doganave të Maqedonisë, zotin  Gjoko Tanasoski.  Gjatë këtij takimi zonja Ikonomi vlerësoi  vazhdimin në mënyrë të rregullt të shkëmbimit paraprak të të dhënave, midis dy administratave doganore respektive, çka  bën të mundur shkëmbimin elektronik të të dhënave në kohë reale duke kontribuar në identifikimin e rasteve me risk më të lartë dhe në konstatimin e shkeljeve doganore.

Krerët e Doganave të dy  vendeve ranë dakort që së shpejti të ngrihet  një grup pune i përbashkët  për monitorimin e zbatimit të Marrëveshjeve që parashikojnë ndihmë të ndërsjellë administrative në çështjet doganore, si dhe rritjen e bashkëpunimit ndërkufitar. Më konkretisht mbi mundësinë e kalimit të kufirit të përbashkët Qafë Thanë – Kafasan.

Doganat Shqiptare bashkëpunojnë me Drejtorinë Doganore të Maqedonisë edhe në kuadër të anëtarësimit dhe aktiviteteve të përbashkëta me Organizatën Botërore të Doganave, si dhe aktivitete rajonale të organizuara nga SELEC ose projekte të ndryshme.  Në vitin 2017 volumi i shkëmbimeve tregtare me Maqedoninë ka qenë  778. 8 mijë ton me një vlerë prej  128 milion Euro.