Njohja rajonale e AEO-ve, lehtësim për shkëmbimet tregtare (Publikuar dt. 30/03/2018)

Njohja reciproke e Operatorëve Ekonomik të Autorizuar(AEO) midis vendeve anëtare të CEFTA-s do të  sjell  lehtësi të madhe për Opertorët që do të përfitojnë këtë status dhe  shkëmbimet tregtare mes vendeve .

Drejtore e Përgjithshme e Doganave,  zonja Belinda Ikonomi mori pjesë  në përfundim të Workshopit “Mbështetje për lehtësimin e tregtisë midis paleve të CEFTA-s”. Ky workshop u organizua nga GIZ dhe me pjesëmarrjen e përfaqësuesve nga të gjitha vendet anëtarë të CEFTA.   

Zonja Ikonomi vlerësoi organizimin e këtij workshopi si vazhdim i bashkëpunimit Rajonal në kuadër të angazhimit madhor të ndërrmarë në Samitin e fundit të Procesit të Berlinit, të mbajtur në Trieste, të Italisë në korrik 2017, ku Kryeministrat e vendeve të Ballkanit shprehën vendosmëri të fortë për të punuar së bashku për krijimin e një Zone Ekonomike Rajonale (REA). Ky plan pjesërisht do të koordinohet dhe monitorohet edhe nga CEFTA për disa fusha të caktuara.  Meqënëse shtylla e parë e Planit të Veprimit për avancimin e mëtejshëm të integrimit tregtar rajonal përfshin një numër veprimesh që synojnë përshpejtimin e procedurave ndërkufitare në përputhje me Protokollin Shtesë 5 të CEFTA-s, zonja  Ikonomi  informoi, se  në Shqipëri ky dokument ka kaluar tashmë në te gjitha Komisionet Parlamentare  dhe pritet të miratohet  nga Parlamenti.

“Objektiva parësore për Administratën tonë  në kuadër të këtij  Protokolli janë, thjeshtimi i inspektimeve, reduktimi i formaliteteve të eksportit, shkëmbimi elektronik i të dhënave, njohja reciproke e testeve laboratorike dhe AEO-ve, zbatimi efektiv i kontrollit të riskut  dhe bashkëpunimi me agjencitë e tjera që veprojnë në kufi”, tha Ikonomi.

Administrata Doganore Shqiptare ka  krijuar  një strukturë të posacme   për AEO-të dhe lehtësirat doganore. Në këtë kuadër ka nisur një fushatë sensibilizimi për nxitjen e biznesit për të aplikuar dhe përfituar nga lehtësirat doganore.

“Prioritet i Qeverisë Shqiptare  është krijimi i një klime të favorshme për biznesin,  të cilin e konsideron motor të  zhvillimit ekonomik të vendit. Kështuqë njohja reciproke e AEO-ve  midis vendeve anëtare të CEFTA-s padyshim që  sjell një lehtësi të madhe për Opertorët që do të përfitojnë këtë status në të gjithë rajonin”, u shpreh gjatë këtij aktiviteti Drejtore e Përgjithshme e Doganave.