Njoftim (Publikuar dt. 19/02/2018)

Më  15-16 shkurt 2018 u zhvillua Takimi Bilateral midis delegacioneve të Drejtorisë së Përgjithshme të Doganave të Republikës së Shqipërisë dhe Ministrisë së Doganave dhe Tregtisë të Republikës së Turqisë, kryesuar nga znj.Belinda Ikonomi, Drejtor i Përgjithshëm dhe z. Cenap Aşci, Drejtor i Përgjithshëm i Doganave Turke.

Ky takim përforcoi marrëdhëniet shumë të mira ekzistuese midis dy institucioneve duke pranuar rëndësinë e rolit doganor për t'iu përgjigjur ndryshimeve të shpejta në mjedisin ndërkombëtar të tregtisë dhe çështjet e sigurisë.

Në kuadër të Memorandumit të Mirëkuptimit për Themelimin e Komitetit të Përbashkët për Çështjet Doganore të nënshkruar më 4 prill 2016, u zhvillua dhe takimi i parë i këtij Komiteti, ku me një frymë bashkëpunimi dhe respekt të ndërsjellë, të dy delegacionet shprehën gatishmërinë e tyre për të zhvilluar pika konkrete kontakti për një shkëmbim më të shpejtë dhe më efektiv  informacioni dhe rezultate më produktive.

Gjatë takimit u ra dakord që ekspertiza e vlefshme e Administratës Doganore të Turqisë në Programin e Operatorëve Ekonomikë të Autorizuar, si dhe Single Window, mund të shkëmbehet me Administratën Doganore Shqiptare dhe pala turke propozoi të dërgonte një draft Plan Veprimi për bashkëpunimin e AEO-ve për tu shqyrtuar nga pala shqiptare.

Dy delegacionet doganore ranë dakord të mbajnë operacione të përbashkëta dhe të ndihmojnë njëra-tjetrën në luftën kundër trafikimit dhe kontrabandës.

Gjithashtu do të organizohen vizita të ndryshme pune pranë Administratës Doganore Turke, duke ndihmuar në modernizimin e Doganave Shqiptare përmes nivelit të lartë të ekspertizës dhe pajisjeve moderne.