Njoftim (Publikuar dt. 14/02/2018)

Më 9 deri më 10 shkurt 2018, Drejtoresha e Përgjithshme e Doganave, znj.Belinda Ikonomi mori pjesë në Konferencën e Parë Botërore të E-Tregtisë Ndërkufitare, që u zhvillua në Pekin, Kinë.

Kjo konferencë solli së bashku vendimmarrësit e nivelit të lartë (drejtuesit e organizatave), si dhe ekspertë operacionalë nga Administratat Doganore, agjencitë e tjera qeveritare, operatorët e E-Tregtisë, organizatat ndërkombëtare, komunitetet ekonomike rajonale, akademia dhe aktor të tjerë në zinxhirin e furnizimit të E-Tregtisë ndërkufitare.

Me temën “Një qasje inovative, gjithëpërfshirëse, strategjike dhe bashkëpunuese për një E-Tregti të qëndrueshme ndërkufitare”, kjo Konferencë shqyrtoi parimet kryesore dhe modelet efektive të menaxhimit që përputhen me zhvillimin e E-Tregtisë ndërkufitare, pasqyroi pikëpamjet dhe sugjerimet nga këndvështrime të ndryshme mbi masat e lehtësimit dhe kontrollit të Doganave, si dhe paraqiti zgjidhje bashkëpunuese për adresimin e sfidave që lidhen me lehtësimin e tregtisë për shkak të volumeve në rritje, sigurinë dhe mbrojtjen dhe mbledhjen e detyrimeve dhe taksave.

Gjatë këtij eventi, znj. Ikonomi zhvilloi një takim bilateral me z. Li Guo, Zv/Ministër për Doganat, gjatë të cilit u vlerësua rëndësia e Marrëveshjes së nënshkruar në nëntor 2017, ndërmjet Drejtorisë së Përgjithshme të Doganave dhe Administratës Doganore të Republikës Popullore të Kinës mbi bashkëpunimin dhe ndihmën e ndërsjelltë administrative në çështjet doganore.  Nisur nga fryma e forcimit të marrëdhënieve midis Shqipërisë dhe Kinës, të dy palët folën për konkretizimin e zbatimit të marrëveshjes, bashkëpunimin në fushën e zbatimit të ligjit dhe për nismën e bashkëpunimit Kinë-Vendet e Evropës Qendrore dhe Lindore.