Drejtoresha e Përgjithshme e Doganave, znj. Belinda Ikonomi merr pjesë në takimin rajonal të DPD të vendeve të Ballkanit Perendimor (Publikuar dt. 05/12/2017)

Në datat 30 Nëntor-1 Dhjetor 2017, Drejtoresha e Përgjithshme e Doganave, znj. Belinda Ikonomi dhe Athanas Andoni, Drejtor i Drejtorisë së Tarifës dhe Origjinës morën pjesë në takimin rajonal informal të nivelit të lartë të Drejtorëve të Përgjithshëm të Doganave të vendeve të Ballkanit Perendimor në Shkup.

 Në takim mori pjesë Kryeministri i Republikës së Maqedonisë, z. Zoran Zaev, i cili theksoi rëndësinë që ka krijimi i një zone rajonale ekonomike si dhe lehtësimi i mëtejshëm i tregëtisë si shtysa drejt anëtarësimit në BE i vendeve të Ballkanit Perendimor.

 Në datën 1 Dhjetor u zhvillua takimi informal me drejtuesit e lartë të doganave të vendeve të Ballkanit Perendimor, organizuar nga autoritetet doganore maqedonase. Në takim morën pjesë edhe përfaqësues nga USAID Maqedoni, Bankës Botërore, Keshillit për Koperimin Rajonal, Organizatës Botërore të Tregtisë, Drejtorisë së Përgjithshme të Taksimit dhe Doganave në Bashkimin Europian (DG TAXUD) si dhe Sekretariati i CEFTA-s.

 z. Gjoko Tanasoski, Drejtor i Përgjithshëm i Doganës Maqedonase ritheksoi rolin kyç që kanë autoritetet doganore në procesin e liberalizimit të tregtisë duke siguruar një shkëmbim efikas të të dhënave ndërmjet vendeve të rajonit, përshpejtuar procedurat në pikat e kalimit kufitar si dhe kërkesa për thjeshtësime dhe lehtësime të mëtejshme të procedurave të import-eksportit.

 Sipas axhendës u vazhdua me prezantimet e disa prej pjesëmarrësve në të cilat theksohej rëndësia e lehtësimit të mëtejshëm të tregtisë, hapat e ndërmarra bazuar në planin e punës disavjeçar të miratuar si dhe detyrimet e tjera.

Gjatë prezantimeve vemendje i’u kushtua edhe Protokollit Shtesë 5, ku vendet anëtare të Marrëveshjes CEFTA, në përputhje me objektivat politike të Procesit të Berlinit dhe në përgjigje të nevojës për thellimin e mëtejshëm të integrimit tregtar në rajon, kanë negociuar këtë protokoll, i cili synon krijimin e sinergjive midis vendeve të rajonit për lehtësimin e tregëtisë.

Ky Protokoll përmban dispozita të cilat mbështeten në detyrime dhe angazhime të marra në kuadër të Marrëveshjes së Lehtësimit të Tregtisë në OBT, kërkesa për thjeshtësime dhe lehtësime të mëtejshme të procedurave që lidhen me import-eksportin, si dhe vendos një kuadër të ri detyrimesh për mos krijimin e pengesave të panevojshme në tregti.