Drejtoria e Përgjithshme e Doganave takim informues mbi procedurat e reja të transitit (Publikuar dt. 23/11/2017)

NJOFTIM

Nën kujdesin e veçantë të Drejtoreshës së Përgjithshme të Doganave, Znj. Belinda Ikonomi, u mbajt sot në ambientet e DPD një takim informues në kuadrin e Projektit të Binjakëzimit "Modernizimi i Administratës Doganore Shqiptare" i drejtuar nga Administrata Doganore Italiane dhe Franceze, financuar nga Bashkimit Evropian, Programi IPA 2012 .

Takimi kishte si synim informimin e operatorëve ekonomikë mbi rëndësinë e NCTS ( New Computerised Transit System/Sistemit të Ri të Kompjuterizuar të Transitit) që duhet të zbatohet nga Administrata Doganore Shqiptare në dobi të operatorëve ekonomikë shqiptarë në kuadër të tregtisë ndërkombëtare ndërmjet Evropës dhe Ballkanit Perëndimor. 

Zëvendës Drejtori i Përgjithshëm i Administratës Doganore Shqiptare, Znj. Mirela Meko deklaroi se BE ka qenë donatori më i madh i sektorit doganor dhe ka mbështetur modernizimin e Administratës Doganore nëpërmjet përafrimit me standardet e BE-së, duke përfshirë legjislacionin dhe procedurat.

Znj. Meko përmendi rëndësinë e bashkëpunimit midis doganës dhe operatorëve ekonomikë për një zbatim të suksesshëm të NCTS-së , i cili do të mundësojë zbatimin e procedurave të përbashkëta të transitit me vendet e BE-së.  Ky është një nga kushtet e detyrueshme që duhet të plotësohen nga Administrata Doganore Shqiptare në kuadër të  angazhimit të qeverisë shqiptare ndaj BE.

Gjatë takimit, ekspertët e binjakëzimit prezantuan zhvillimin e NCTS-ë që nga fillimi duke vlerësuar përfitimet e këtij sistemi për tregtinë ndërkombëtare. Ekspertët e binjakëzimit ilustruan zbatimin e një operacioni tranziti në mjedisin NCTS duke u fokusuar në shkëmbimin e mesazheve elektronike midis zyrave doganore dhe operatorëve ekonomikë.

Sesioni i fundit ju kushtua përshkrimit të Shërbimeve Qëndrore të BE-së në kuadër të Konventës së Transitit të Përbashkët.

Në takim ishin të pranishëm përfaqësues të të gjitha grupeve të interest privat si: operatorët e biznesit, organizatat e transportit dhe agjencitë doganore.

Në fund të takimit të gjithë pjesëmarrësit ranë dakord për rëndësinë e zhvillimit të modulit të softuerit shqiptar të NCTS-ë duke marrë parasysh nevojat e operatorëve ekonomikë për të lehtësuar qasjen në këtë sistem me nisjen e tij, parashikuar në vitin 2020.

KABINETI