Dogana Shqiptare në kuadër të Operacionit Rajonal “NELSON” kundër flukseve të paligjshme të parasë.

Më datë 4 nëntor 2026, në selinë e Qendrës për Zbatimin e Ligjit në Evropën Juglindore (SELEC), në Bukuresht, u zhvillua takimi përmbyllës i Operacionit Rajonal “NELSON”, i fokusuar në luftën kundër lëvizjes së paligjshme të parave të gatshme dhe mallrave me vlerë të lartë.

Administrata Doganore Shqiptare, në bashkëpunim me Policinë e Shtetit, mori pjesë aktive në këtë operacion, i cili u zhvillua në dy faza gjatë muajit mars 2026, me përfshirjen e autoriteteve doganore dhe policore të vendeve anëtare të SELEC.

Gjatë operacionit u intensifikuan kontrollet në pikat e kalimit kufitar, me qëllim identifikimin e rasteve të mosdeklarimit të parave të gatshme, instrumenteve të negociueshme të prurësit dhe mallrave me vlerë, si dhe parandalimin e flukseve të paligjshme financiare.

Takimi, i drejtuar nga z. Chavdar Georgiev, Drejtor për Operacionet në SELEC, me pjesëmarrjen edhe të përfaqësuesve të autoritetit britanik HMRC, shërbeu për analizimin e rezultateve operacionale, shkëmbimin e përvojave dhe identifikimin e mundësive për forcimin e bashkëpunimit rajonal.

Dogana Shqiptare mbetet e angazhuar në forcimin e kontrolleve kufitare, parandalimin e pastrimit të parave dhe luftën kundër krimit të organizuar, nëpërmjet bashkëpunimit ndërinstitucional dhe pjesëmarrjes aktive në operacionet ndërkombëtare.