Administrata Doganore Shqiptare pjesë e seminarit për luftën kundër trafikimit të pasurive kulturore

Tiranë, 13 Tetor 2026 - Në kuadër të bashkëpunimit ndërkombëtar për parandalimin dhe luftën kundër trafikimit të paligjshëm të pasurive kulturore, në Tiranë u zhvillua seminari “Lufta kundër trafikut të pasurive kulturore”, me pjesëmarrjen e përfaqësuesve të autoriteteve doganore, policore dhe gjyqësore të Shqipërisë dhe Francës.

Seminari shërbeu si një platformë për shkëmbimin e njohurive dhe përvojave ndërmjet institucioneve të të dy vendeve, duke u fokusuar në identifikimin, kontrollin dhe hetimin e rasteve të trafikimit të pasurive kulturore, si dhe në forcimin e mekanizmave të bashkëpunimit për mbrojtjen e trashëgimisë kulturore.

Gjatë aktivitetit u trajtuan çështje që lidhen me identifikimin e objekteve dhe vendeve të cenueshme nga trafikimi, rrugët dhe rrjetet e trafikut të paligjshëm, si dhe metodat e hetimit dhe ndjekjes penale të këtyre veprave. Një vëmendje e veçantë iu kushtua rolit të autoriteteve doganore në kontrollet kufitare, identifikimin e mallrave të dyshuara dhe bashkëpunimin me strukturat ligjzbatuese në nivel kombëtar dhe ndërkombëtar.

Ekspertët francezë ndanë përvojën e tyre në fushën e arkeologjisë, hetimeve policore, kontrolleve doganore dhe procedurave gjyqësore, duke prezantuar praktika dhe instrumente që ndihmojnë në parandalimin e trafikimit, sekuestrimin dhe kthimin e objekteve të trafikuara.

Pjesëmarrja e përfaqësuesve të Administratës Doganore Shqiptare në këtë aktivitet kontribuon në forcimin e kapaciteteve profesionale dhe shkëmbimin e praktikave të mira, duke theksuar rëndësinë e bashkëpunimit ndërinstitucional dhe ndërkombëtar në luftën kundër trafikimit të paligjshëm të pasurive kulturore dhe mbrojtjen e trashëgimisë kulturore.