Të ardhurat nga Doganat në 8 muajt e parë të vitit arrijnë në rreth 165 miliardë lekë

Tiranë, 24 Shtator 2026 - Të ardhurat e administruara nga Drejtoria e Përgjithshme e Doganave gjatë 8-mujorit të parë të vitit 2026 arritën në 164.9 miliardë lekë, ose rreth 6.8 miliardë lekë më shumë krahasuar me të njëjtën periudhë të vitit 2025.

Ky është niveli më i lartë i të ardhurave nga Doganat për një periudhë 8-mujore, duke reflektuar përmirësimin e administrimit doganor, lehtësimin e tregtisë së ligjshme dhe forcimin e kontrolleve për garantimin e konkurrencës së ndershme dhe mbrojtjen e interesave fiskale të shtetit.

FAKTORËT KRYESORË QË KANË NDIKUAR NË RRITJEN E TË ARDHURAVE:

Akciza

Të ardhurat nga akciza janë rritur me rreth 2 miliardë lekë krahasuar me 8-mujorin e vitit 2025. Kontributin kryesor në këtë rritje e ka dhënë importi i cigareve, me rreth 1.4 miliardë lekë më shumë, i shoqëruar edhe me rritje të sasisë së importuar dhe të konsumit me rreth 111 tonë.

Rritje të të ardhurave janë regjistruar gjithashtu nga:

·         Karburanti i importuar: +258 milionë lekë

·         Produkte të tjera: +66 milionë lekë

·         Duhani i prodhuar në vend: +41 milionë lekë

·         Birra e importuar: +36 milionë lekë

TVSH në import

Të ardhurat nga TVSH-ja në import janë rritur me rreth 4.4 miliardë lekë krahasuar me të njëjtën periudhë të vitit 2025.

Rritja është ndikuar kryesisht nga:

·         Karburanti i importuar: +2.5 miliardë lekë

·         Veshjet: +673 milionë lekë

·         Cigaret: +462 milionë lekë

·         Kompjuterë dhe printerë: +304 milionë lekë

Taksa doganore

Të ardhurat nga taksat doganore janë rritur me rreth 568 milionë lekë, ku ndër kategoritë që kanë dhënë kontributin kryesor janë:

·         Veshje, këpucë dhe artikuj të tjerë: +136 milionë lekë

·         Metalet bazë: +74 milionë lekë

·         Produkte të tjera: +64 milionë lekë

Rezultatet e 8-mujorit dëshmojnë vijimin e performancës pozitive të të ardhurave doganore, në një kohë kur Administrata Doganore vijon të kombinojë lehtësimin e procedurave për biznesin me forcimin e kontrollit dhe luftën ndaj informalitetit, në funksion të një tregu më të rregullt dhe konkurrencës së ndershme.