Drejtori i Doganave vijon vizitat në terren me inspektimin e Degëve Doganore Qafë Botë dhe Tre Urat

Tiranë, 24 Gusht 2026 - Drejtori i Përgjithshëm i Doganave, Besmir Beja, vijoi vizitat në terren me inspektimin e Degëve Doganore Qafë Botë dhe Tre Urat, me fokus të veçantë te organizimi i punës dhe përballimi i flukseve të sezonit veror.

Gjatë vizitave, Drejtori Beja vlerësoi nga afër menaxhimin e lëvizjeve në hyrje dhe dalje, koordinimin e punës dhe respektimin e procedurave doganore, me synim ofrimin e një shërbimi sa më efikas për udhëtarët dhe bizneset.

Në takimet me punonjësit doganorë, ai theksoi rëndësinë e komunikimit profesional, korrektësisë në shërbim dhe përgjegjësisë në çdo hallkë të procesit, veçanërisht në periudhat me ngarkesë të shtuar.

Integriteti mbetet një nga shtyllat kryesore të punës së administratës doganore, së bashku me profesionalizmin dhe zbatimin e njëtrajtshëm të rregullave e procedurave.

Vizitat në pikat doganore vijojnë, si pjesë e një qasjeje të vazhdueshme për të qenë pranë strukturave në terren, për të identifikuar nevojat konkrete dhe për të forcuar standardet e shërbimit doganor.