Drejtori i Përgjithshëm i Doganave prezanton kreun e ri të Degës së Doganës Morinë

Kukës, 25.06.2026 - Drejtori i Përgjithshëm i Doganave, Besmir Beja, zhvilloi një vizitë pune në Degën e Doganës Morinë, ku prezantoi përpara stafit doganor kryetarin e ri të kësaj dege, Bardhyl Dervishi.

Gjatë vizitës, Drejtori i Përgjithshëm inspektoi nga afër veprimtarinë e Degës së Doganës Morinë, një prej pikave më të rëndësishme kufitare të vendit, duke u njohur me ecurinë e punës, sfidat operative dhe prioritetet e kësaj strukture.

Në takimin me stafin doganor, z. Beja vlerësoi angazhimin e punonjësve në përmbushjen e detyrave të tyre dhe theksoi rëndësinë e forcimit të mëtejshëm të standardeve profesionale, zbatimit rigoroz të legjislacionit doganor dhe garantimit të një shërbimi cilësor për qytetarët dhe biznesin.

Duke prezantuar kryetarin e ri, Bardhyl Dervishi, Drejtori i Përgjithshëm shprehu besimin se eksperienca dhe angazhimi i tij do të kontribuojnë në rritjen e performancës së Degës së Doganës Morinë dhe në përmbushjen e objektivave të Administratës Doganore.

Gjatë bashkëbisedimit me stafin, z. Beja nënvizoi se integriteti, profesionalizmi dhe përgjegjshmëria duhet të mbeten vlera themelore në ushtrimin e detyrës, ndërsa kërkoi angazhim maksimal për përmbushjen e objektivave institucionale dhe forcimin e besimit të publikut tek administrata doganore.

Vizita në Morinë u zhvillua në kuadër të takimeve të punës që Drejtoria e Përgjithshme e Doganave po zhvillon në strukturat doganore në vend, me fokus rritjen e performancës, forcimin e kapaciteteve administrative dhe garantimin e standardeve më të larta të shërbimit.