Dogana Shqiptare në Sesionin e 67-të të Nënkomitetit për Rishikimin e Sistemit të Harmonizuar të OBD

Bruksel – 03.06.2026 - Përfaqësues të Administratës Doganore Shqiptare morën pjesë në Sesionin e 67-të të Nënkomitetit për Rishikimin e Sistemit të Harmonizuar, (HS Review Sub-Committee) organizuar nga Organizata Botërore e Doganave në Bruksel, Belgjikë.

Ky forum teknik ndërkombëtar mblodhi ekspertë doganorë nga administratat anëtare të OBD-së për të diskutuar dhe shqyrtuar propozime që lidhen me përditësimin dhe modernizimin e Sistemit të Harmonizuar, standardi global i përdorur për klasifikimin e mallrave në tregtinë ndërkombëtare.

Gjatë punimeve të sesionit u trajtuan një sërë çështjesh me rëndësi për zhvillimin e nomenklaturës doganore në kuadër të ciklit të tetë të rishikimit të Sistemit të Harmonizuar (HS 2033). Diskutimet përfshinë klasifikimin e produkteve dhe teknologjive të reja, përmirësimin e transparencës në flukset tregtare të produkteve plastike, trajtimin e produkteve ushqimore të prodhuara me teknologji inovative, si dhe amendime të tjera që synojnë përshtatjen e nomenklaturës me zhvillimet e tregtisë dhe industrisë globale.

Po ashtu, pjesëmarrësit shqyrtuan propozime për përditësimin e Shënimeve Shpjeguese të Sistemit të Harmonizuar (HS 2028), duke adresuar çështje që lidhen me produkte farmaceutike, pajisje teknologjike, robotikë, avionë pa pilot, produkte ushqimore dhe kategori të tjera mallrash që kërkojnë sqarime të mëtejshme për klasifikimin e tyre.

Pjesëmarrja e Administratës Doganore Shqiptare në këtë sesion përfaqëson një mundësi të rëndësishme për të kontribuuar në proceset ndërkombëtare të zhvillimit të legjislacionit dhe standardeve doganore, si dhe për të siguruar përafrimin e praktikave kombëtare me standardet më të avancuara të Organizatës Botërore të Doganave.

Angazhimi aktiv në forumet teknike të OBD-së forcon kapacitetet profesionale të Administratës Doganore dhe mbështet objektivin për një klasifikim sa më të saktë, transparent dhe të harmonizuar të mallrave, në funksion të lehtësimit të tregtisë së ligjshme dhe garantimit të sigurisë së zinxhirit ndërkombëtar të furnizimit.