Forcimi i bashkëpunimit ekonomik, Drejtori i Doganave pret Ambasadorin e Indisë në Shqipëri

Tiranë, 20.05.2026 - Drejtori i Përgjithshëm i Doganave, z. Besmir Beja, zhvilloi sot një takim zyrtar me Ambasadorin e Indisë në Shqipëri, Sh.T.Z. Ravindra Prasad Jaiswal, në kuadër të forcimit të bashkëpunimit institucional dhe marrëdhënieve ekonomike ndërmjet dy vendeve.

Palët diskutuan mbi mundësitë për thellimin e bashkëpunimit në fushën doganore, lehtësimin e procedurave tregtare, shkëmbimin e eksperiencave profesionale dhe forcimin e kapaciteteve administrative në përputhje me standardet ndërkombëtare.

Gjatë bisedës u vlerësuan marrëdhëniet shumë të mira që ekzistojnë ndërmjet Shqipërisë dhe Indisë, si edhe bashkëpunimi në kuadër të organizmave ndërkombëtarë, veçanërisht në forumet dhe aktivitetet e përbashkëta.

Në fokus të diskutimeve ishte edhe rëndësia e rritjes së shkëmbimeve tregtare mes dy vendeve, si dhe identifikimi i mundësive të reja për nxitjen e bashkëpunimit ekonomik. Palët theksuan rëndësinë e modernizimit të administratave doganore dhe përdorimin e teknologjisë në funksion të lehtësimit të procedurave dhe rritjes së transparencës.

Drejtori i Përgjithshëm i Doganave vlerësoi interesin e Ambasadës së Indisë për forcimin e bashkëpunimit me Administratën Doganore Shqiptare, duke shprehur gatishmërinë për të vijuar komunikimin dhe koordinimin institucional në funksion të marrëdhënieve ekonomike dhe tregtare mes dy vendeve.