Dogana Shqiptare pjesë e sesioneve të Komitetit të Përhershëm Teknik të Organizatës Botërore të Doganave

Bruksel, 11.05.2026 - Administrata Doganore Shqiptare mori pjesë në Sesionet e 251-të dhe 252-të të Komitetit të Përhershëm Teknik (Permanent Technical Committee – PTC) të Organizatës Botërore të Doganave, të zhvilluara në Bruksel, Belgjikë, me pjesëmarrjen e mbi 280 përfaqësuesve nga administratat doganore, organizatave ndërkombëtare dhe sektorit privat.

 Takimi u fokusua në modernizimin e operacioneve doganore, zhvillimet teknologjike, tregtinë elektronike ndërkufitare dhe forcimin e bashkëpunimit ndërkombëtar për përballimin e sfidave të reja në fushën doganore.

 Gjatë sesioneve u diskutuan dhe u miratuan një sërë instrumentesh dhe mekanizmash të rëndësishëm që mbështesin transformimin modern të administratave doganore, përfshirë:

 ·         përditësimin e Modelit të të Dhënave të OBD-së;

·         raportin mbi teknologjitë inovative dhe transformuese për vitin 2026;

·         udhëzues të përditësuar mbi Zonat e Lira Ekonomike;

·         zhvillimet në kuadër të projektit Smart Customs;

·         si dhe standardet dhe specifikimet teknike për tregtinë elektronike ndërkufitare.

 Një vëmendje e veçantë iu kushtua sfidave që lidhen me rritjen e tregtisë elektronike ndërkombëtare, menaxhimin e riskut, cilësinë e të dhënave dhe përdorimin e teknologjive të avancuara për lehtësimin e tregtisë së ligjshme dhe forcimin e kontrolleve doganore.

 Sesioni trajtoi gjithashtu tema që lidhen me tregtinë e qëndrueshme, kufijtë e brishtë, bashkëpunimin Doganë–Postë dhe zbatimin e Marrëveshjes për Lehtësimin e Tregtisë të World Trade Organization.

 Pjesëmarrja e Doganës Shqiptare në këtë forum të rëndësishëm teknik konfirmon angazhimin e administratës për të ndjekur standardet dhe praktikat më të avancuara ndërkombëtare në funksion të modernizimit të proceseve doganore, lehtësimit të tregtisë dhe forcimit të sigurisë në zinxhirin ndërkombëtar të furnizimit.