Doganat shqiptare pjesë e trajnimit për forcimin e hetimeve financiare proaktive dhe paralele

Tiranë, 27.04.2026 - Drejtoria e Përgjithshme e Doganave mori pjesë në trajnimin me temë “Forcimi i Agjencive Ligjzbatuese për gjurmimin e flukseve financiare përmes hetimeve financiare proaktive dhe paralele”.

Trajnimi u zhvillua në kuadër të projektit “EU for Law Enforcement in Albania (EU4LEA II)”, i financuar nga Bashkimi Evropian dhe bashkëfinancuar nga Ministria Federale Gjermane për Bashkëpunim Ekonomik dhe Zhvillim, me një buxhet total prej 10.2 milionë euro. Projekti zbatohet nga Ministria e Brendshme Italiane, Civipol dhe GIZ.

Gjatë tre ditëve të trajnimit, pjesëmarrësit përfituan njohuri të avancuara mbi kuadrin ligjor dhe instrumentet për identifikimin dhe konfiskimin e aseteve të paligjshme, metodologjitë e hetimeve financiare proaktive dhe paralele, si dhe përdorimin e mjeteve bashkëkohore hetimore. Një vëmendje e veçantë iu kushtua kripto-aseteve dhe rreziqeve që lidhen me përdorimin e tyre në aktivitete kriminale, sistemeve bankare informale, si dhe mekanizmave të bashkëpunimit ndërkombëtar, përfshirë strukturat e rikuperimit të aseteve (Asset Recovery Offices).

Trajnimi u drejtua nga ekspertë ndërkombëtarë dhe oficerë të lartë të Guardia di Finanza, të cilët ndanë përvojën e tyre praktike përmes rasteve studimore dhe shembujve operacionalë, duke sjellë modele konkrete të hetimeve financiare në nivel europian.

Në këtë aktivitet morën pjesë 22 përfaqësues nga institucione të ndryshme ligjzbatuese në vend, duke kontribuuar në forcimin e bashkëpunimit ndërinstitucional dhe në harmonizimin e qasjeve hetimore. Pjesëmarrja e përfaqësuesve të Doganave në aktivitete të tilla kontribuon në rritjen e efektivitetit të hetimeve doganore dhe në forcimin e rolit të administratës doganore në garantimin e sigurisë ekonomike dhe luftën kundër krimit financiar.