Vendim i Bordit të Transparencës, datë 08 Prill 2026

Bordi i Transparencës dhe Kufizimit të Përkohshëm të Çmimeve miratoi, me Vendimin nr. 4, datë 08.04.2026, çmimet tavan për tregtimin me shumicë dhe pakicë të nënprodukteve të naftës dhe gazit.

 
Vendimi është marrë në vijim të masave për menaxhimin e situatës në tregun e hidrokarbureve dhe mbështetet në kuadrin ligjor në fuqi, përfshirë Vendimin e Këshillit të Ministrave nr. 186, datë 19.03.2026, si dhe Aktin Normativ nr. 1, datë 03.04.2026, lidhur me aplikimin e nivelit të reduktuar të akcizës për produktin gazoil.

 
Bazuar në metodologjinë përkatëse dhe zhvillimet në tregjet ndërkombëtare, rezultoi se çmimi i shitjes me pakicë për gazoilin do të ishte mbi pragun e përcaktuar, çka solli rillogaritjen e çmimeve duke aplikuar nivelin 80% të akcizës. Në këtë kuadër, është zbatuar niveli i reduktuar i akcizës për gazoilin, në përputhje me përcaktimet ligjore.

 
Çmimet e miratuara nga Bordi janë çmime tavan (maksimale), që përfshijnë detyrimet doganore, tatimore dhe TVSH-në, dhe janë të detyrueshme për të gjithë operatorët ekonomikë. Tregtimi mbi këto çmime nuk lejohet, ndërsa operatorët janë të lirë të ofrojnë çmime më të ulëta.

 
Sipas vendimit, çmimet tavan janë:

 
Për shitjen me shumicë:

• 208 lekë/litri për gazoilin

• 169 lekë/litri për benzinën

 
Për shitjen me pakicë:

• 220 lekë/litri për gazoilin

• 181 lekë/litri për benzinën

 
Gjithashtu, është ngarkuar administrata doganore për zbatimin në sistem të nivelit të reduktuar të akcizës për produktin gazoil, sipas përcaktimeve përkatëse.

Vendimi hyn në fuqi në datën 08 prill 2026, ora 15:30, dhe do të mbetet në fuqi deri në një njoftim të dytë nga Bordi.

Ky vendim është i detyrueshëm për të gjitha subjektet që operojnë në tregtimin me shumicë dhe pakicë të nënprodukteve të naftës dhe gazit.