Dialog i hapur me bizneset austriake për reformat doganore dhe integrimin në BE

Tiranë, 08.04.2026 - Sot u zhvillua Forumi Dogana–Biznes me përfaqësues të sipërmarrjeve austriake që operojnë në Shqipëri, një platformë e rëndësishme dialogu mes Administratës Doganore dhe komunitetit të biznesit, me fokus forcimin e bashkëpunimit, lehtësimin e tregtisë dhe përshpejtimin e reformave drejt integrimit europian.

 
Diskutimet u përqendruan në politikat kyçe dhe reformat doganore për vitin 2026, me theks të veçantë te digjitalizimi i procedurave, avancimi i projektit “Dritarja e Vetme Doganore” (National Single Window), harmonizimi me standardet e Bashkimit Europian dhe transparenca për tarifat doganore.

 
Në fjalën e tij, Drejtori i Përgjithshëm i Doganave, z. Besmir Beja, rikonfirmoi angazhimin e Administratës Doganore si një partner i besueshëm i biznesit në procesin drejt standardeve evropiane. “Ne mbështetemi në parimin e lehtësimit të mëtejshëm të tregtisë së ndershme, përmes digjitalizimit të plotë të shërbimeve dhe thjeshtimit të procedurave. Aktualisht, 100% e shërbimeve për biznesin ofrohen online, duke rritur ndjeshëm shpejtësinë, transparencën dhe duke ulur kohën e procesimit,” u shpreh ai.

 
Në vijim, Drejtori i Përgjithshëm prezantoi vizionin për transformimin e plotë digjital dhe institucional të doganave shqiptare, duke theksuar rolin e Inteligjencës Artificiale në rritjen e efikasitetit dhe saktësisë së kontrollit: 

 
“Synojmë kalimin drejt një administrate doganore parashikuese, të drejtuar nga të dhënat dhe e bazuar në risk. Inteligjenca artificiale do të reduktojë kontrollet e panevojshme dhe do të forcojë luftën kundër kontrabandës dhe mashtrimit fiskal,” u shpreh ai, duke shtuar se tashmë kanë nisur testimet e para të suksesshme në bashkëpunim me AKSHI dhe Microsoft.

 
Gjithashtu, u bë e ditur se sistemi ASYCUDA do të përditësohet në një version të avancuar me 25 module të reja në përputhje me standardet e BE-së, si dhe do të vijojë procesi i përafrimit të plotë të legjislacionit doganor shqiptar me atë të Bashkimit Europian brenda vitit 2026, në kuadër të Kapitullit 29.

 
Në forum mori pjesë edhe Ambasadorja e Austrisë në Shqipëri, znj. Monika Zach, e cila vlerësoi progresin e Administratës Doganore Shqiptare: “Forume të tilla krijojnë një urë të drejtpërdrejtë komunikimi mes institucioneve dhe biznesit, duke kontribuar në një mjedis më të parashikueshëm dhe transparent për investitorët e huaj,” theksoi ajo.

 
Përfaqësuesit e bizneseve austriake vlerësuan rolin e Administratës Doganore si një nga institucionet lider në procesin e integrimit të Shqipërisë në Bashkimin Europian, duke theksuar gjithashtu përkushtimin dhe profesionalizmin e stafit doganor, si elementë kyç në përmirësimin e klimës së të bërit biznes në vend.

 
Administrata Doganore Shqiptare mbetet e angazhuar për të vijuar dialogun e hapur me komunitetin e biznesit dhe për të avancuar reformat që mbështesin zhvillimin ekonomik dhe integrimin evropian të vendit.