Vendim i Bordit të Transparencës, datë 03 Prill 2026

Tiranë, 3 prill 2026 – Bordi i Transparencës dhe Kufizimit të Përkohshëm të Çmimeve ka miratuar sot, me Vendimin nr. 3, datë 03.04.2026, çmimet tavan për tregtimin me shumicë dhe pakicë të nënprodukteve të naftës dhe gazit, në kuadër të masave për menaxhimin e situatës në tregun e hidrokarbureve.

Vendimi bazohet në aktet ligjore në fuqi, përfshirë Vendimin e Këshillit të Ministrave nr. 186, datë 19.03.2026, si dhe Aktin Normativ nr. 1, datë 03.04.2026, i cili parashikon aplikimin e nivelit të reduktuar të akcizës në rastet kur çmimi i shitjes me pakicë të gazoilit tejkalon pragun e përcaktuar.

Në këtë kuadër, pas reflektimit të çmimeve në bursat ndërkombëtare dhe zbatimit të metodologjisë përkatëse, është bërë rillogaritja e çmimit për produktin gazoil, duke aplikuar nivelin e reduktuar të akcizës. Po ashtu, vlera “premio” zbatohet sipas publikimeve të një dite më parë.

Çmimet e miratuara nga Bordi janë çmime tavan (maksimale), të cilat përfshijnë detyrimet doganore, tatimore dhe TVSH-në, dhe janë të detyrueshme për të gjithë operatorët ekonomikë. Tregtimi mbi këto çmime nuk lejohet, ndërsa lejohet shitja me çmime më të ulëta.

Sipas vendimit, çmimet tavan janë si më poshtë:

Për shitjen me shumicë:

• 212 lekë/litri për gazoilin

• 169 lekë/litri për benzinën

Për shitjen me pakicë:

• 224 lekë/litri për gazoilin

• 181 lekë/litri për benzinën

Vendimi hyn në fuqi në datën 03 prill 2026, ora 20:00, dhe do të mbetet në fuqi deri në një njoftim të dytë.

Gjithashtu, është parashikuar zbatimi në sistem i nivelit të reduktuar të akcizës për gazoilin nga strukturat përkatëse, në përputhje me përcaktimet ligjore.

Ky vendim është i detyrueshëm për të gjitha subjektet që operojnë në tregtimin me shumicë dhe pakicë të nënprodukteve të naftës dhe gazit, dhe do të publikohet në Fletoren Zyrtare, si dhe në faqet zyrtare të institucioneve përgjegjëse.