Dogana Shqiptare, pjesë e trajnimit rajonal për bashkëpunimin Doganë–Polici Kufitare të organizuar nga Frontex

Tiranë, 15.03.2026 - Administrata Doganore Shqiptare mori pjesë në trajnimin rajonal për bashkëpunimin Doganë–Polici Kufitare, të organizuar nga Frontex në Sarajevë,. Aktiviteti u zhvillua në kuadër të forcimit të bashkëpunimit ndërinstitucional në menaxhimin e kufijve dhe rritjes së kapaciteteve profesionale të administratave të rajonit për përballimin e sfidave të përbashkëta në sigurinë kufitare.

Në këtë trajnim morën pjesë përfaqësues nga vendet e Ballkanit Perëndimor: Shqipëria, Kosova, Mali i Zi, Maqedonia e Veriut, Bosnjë dhe Hercegovina dhe Serbia, si edhe ekspertë të Frontex, të cilët ndanë praktikat dhe përvojat më të mira në fushën e bashkëpunimit ndërmjet autoriteteve doganore dhe policive kufitare.

Gjatë pesë ditëve të trajnimit, pjesëmarrësit trajtuan një sërë temash të rëndësishme që lidhen me menaxhimin e integruar të kufijve, bashkëpunimin në kryerjen e kontrolleve kufitare, analizën e riskut dhe shkëmbimin e informacionit ndërmjet institucioneve përgjegjëse për sigurinë kufitare. Gjithashtu u diskutua mbi bashkëpunimin në përdorimin e infrastrukturës dhe pajisjeve në pikat e kalimit kufitar, si dhe mbi koordinimin operacional ndërmjet autoriteteve përkatëse.

Një pjesë e rëndësishme e programit iu kushtua edhe parandalimit dhe luftës kundër shkeljeve që lidhen me kufirin, forcimit të kapaciteteve institucionale dhe menaxhimit të pikave të kalimit kufitar. Përmes diskutimeve dhe punës në grupe, pjesëmarrësit shkëmbyen përvoja dhe identifikuan praktika konkrete për përmirësimin e bashkëpunimit ndërinstitucional.

Trajnimi përfshiu gjithashtu tema që lidhen me menaxhimin e krizave, mekanizmat e vlerësimit të bashkëpunimit ndërinstitucional, përfshirë proceset e vlerësimit të zonës Schengen Area dhe vlerësimet e vulnerabilitetit, si dhe hartimin e projekteve të marrëveshjeve të bashkëpunimit ndërmjet institucioneve përkatëse.

Pjesëmarrja e Doganës Shqiptare në aktivitete të tilla rajonale kontribuon në forcimin e bashkëpunimit me partnerët ndërkombëtarë dhe rajonalë, si dhe në rritjen e kapaciteteve profesionale të administratës doganore në mbështetje të sigurisë kufitare dhe lehtësimit të tregtisë.