Ministri i Financave prezanton Drejtorin e ri të Përgjithshëm të Doganave, Besmir Beja (Publikuar dt. 02/02/2026)

Ministri i Financave, Petrit Malaj, prezantoi sot Drejtorin e ri të Përgjithshëm të Doganave, z. Besmir Beja, i cili merr detyrën duke zëvendësuar z. Gent Gazheli.

Gjatë prezantimit, Ministri Malaj vlerësoi kontributin e z. Gazheli në drejtimin e Administratës Doganore, si dhe theksoi rëndësinë e vazhdimësisë institucionale dhe forcimit të mëtejshëm të rolit të Doganave në mbështetje të zhvillimit ekonomik të vendit.

Drejtori i ri i Përgjithshëm, z. Beja, theksoi se prioritetet kryesore të punës së tij do të jenë rritja e angazhimit dhe përgjegjshmërisë së të gjitha strukturave doganore, forcimi i bashkëpunimit ndërinstitucional, si dhe avancimi i mëtejshëm i proceseve integruese, në përputhje me standardet dhe praktikat më të mira evropiane.

Një vëmendje e veçantë do t’i kushtohet zgjerimit dhe përfshirjes së sistemeve inteligjente dhe teknologjive moderne, me qëllim rritjen e eficiencës, transparencës dhe kontrollit në proceset doganore, si dhe rritjen e të ardhurave buxhetore përmes luftës kundër informalitetit dhe evazionit.

Po ashtu, u nënvizua angazhimi për forcimin e sigurisë në pikat doganore, garantimin e kontrollit efektiv të kufijve dhe mbrojtjen e interesit publik, duke siguruar një mjedis të sigurt dhe të besueshëm për qytetarët dhe biznesin.

Administrata Doganore mbetet e angazhuar të vijojë reformat strukturore dhe procesin e modernizimit të shërbimeve, në funksion të integrimit evropian dhe zhvillimit të qëndrueshëm të vendit.