Dogana në forumin me biznesin francez, lehtësim procedurash doganore dhe ftesë për të aplikuar për Operatorë Ekonomik të Autorizuar (Publikuar dt. 22/01/2026)

Ditën e enjte, më 22 janar 2026, u zhvillua takimi ndërmjet Dhomës së Tregtisë dhe Industrisë Francë–Shqipëri (CCIFA) dhe Drejtorisë së Përgjithshme të Doganave, me qëllim forcimin e dialogut institucional dhe thellimin e bashkëpunimit mes administratës doganore dhe komunitetit të biznesit. 

Takimi u hap nga Z. Julien Roche, President i CCIFA, i cili vlerësoi trasparencën dhe profesionalizimin e Administratës Doganore si dhe rëndësinë e këtij komunikimi të drejtpërdrejtë dhe rolin e CCIFA në përfaqësimin e interesave të anëtarëve të saj.  

Zoti Genti Gazheli Drejtori i Përgjithshëm ne fjalen e tij theksoi se ky është takimi i parë zyrtar me CCIFA, i cili pritet të pasohet nga të tjerë, duke shprehur bindjen se ky bashkëpunim do të kontribuojë në forcimin e mëtejshëm të partneritetit Doganë–Biznes. 

Z. Gazheli solli në vëmendje eksperiencat pozitive të mëparshme me operatorë të veçantë ekonomikë franceze, përfshirë dhënien e statusit “Operator Ekonomik i Autorizuar” subjektit MARLOTEX, në prani të përfaqësuesve të lartë të institucioneve shqiptare dhe franceze, si një shembull konkret i bashkëpunimit të suksesshëm dhe ftoi bizneset e pranishme të aplikonin pranë Administratës Doganore për të përfituar nga lehtësitë që ofron ky status. 

Gjithashtu, ne kete takim u theksuan marrëdhëniet historikisht shumë të mira mes Doganave Shqiptare dhe atyre Franceze, bashkëpunimi i vazhdueshëm me Atasheun Doganor Francez dhe Ambasadën Franceze në Tiranë.  

Z. Gazheli shprehu entuziazmin për zgjerimin e këtyre marrëdhënieve edhe në kuadër të CCIFA, duke garantuar mbështetje dhe asistencë maksimale për anëtarët e saj në zhvillimin dhe prosperitetin e bizneseve te tyre në Shqipëri. 

Në vijim, u prezantuan çështjet kryesore të ngritura nga bizneset anëtare, si dhe pritshmëritë e tyre në raport me procedurat dhe shërbimet doganore duke konkluduar për thellimin e bashkëpunimit në funksion të lehtësimit të tregtisë dhe zhvillimit ekonomik.