Zhvillohet Mbledhja e 16-të e Nënkomitetit BE–Shqipëri për Tregti, Industri, Dogana dhe Tatime (Publikuar dt.26/11/2025)

Në Tiranë u zhvillua dje Mbledhja e 16-të e Nënkomitetit BE–Shqipëri për Tregtinë, Industrinë, Doganat dhe Tatimet, një mekanizëm i rëndësishëm në procesin e vlerësimit të progresit të Shqipërisë në kuadër të Kapitullit 29 – Unioni Doganor. Takimi u hap nga Drejtori i Përgjithshëm i Doganave, z. Genti Gazheli, i cili theksoi se ky dialog mbetet pika kryesore e bashkëpunimit me Komisionin Evropian, ku vlerësohen arritjet, adresohen sfidat dhe përcaktohen prioritetet që udhëheqin administratën doganore në rrugën drejt anëtarësimit në BE.

Në fjalën e tij, Drejtori i Përgjithshëm nënvizoi se Dogana Shqiptare ka punuar intensivisht gjatë vitit të fundit në bashkërendim të plotë me DG TAXUD, duke respektuar të gjitha afatet dhe duke dorëzuar dokumentacionin e kërkuar për të katër kriteret mbyllëse të Kapitullit 29. Ai vuri në dukje progresin e arritur në përafrimin ligjor me acquis të BE-së, përgatitjen e kalendarit legjislativ dhe dokumenteve mbështetëse për harmonizimin e kuadrit kombëtar me Kodin Doganor të Unionit.

Një pjesë e rëndësishme e diskutimeve iu kushtua procesit të digjitalizimit. Delegacioni shqiptar informoi Komisionin Evropian për përfundimin e Strategjisë Shumëvjeçare të IT-së dhe Planit të detajuar të Veprimit, dokumente që përcaktojnë hapat për të siguruar ndërveprimin e plotë elektronik me sistemet doganore të BE-së që nga dita e parë e anëtarësimit.

Në vijim, u trajtuan zhvillimet në projektet rajonale dhe ndërkombëtare, si CEFTA dhe SEED+, si dhe ecuria e procesit të aderimit në Protokollin e Konventës së OBSH për Kontrollin e Duhanit, i cili pritet të hyjë në fuqi për Shqipërinë në vitin 2026. U theksuan gjithashtu masat për lehtësimin e tregtisë, përmirësimin e procedurave dhe forcimin e menaxhimit të riskut.

Përfaqësuesit e Komisionit Evropian vlerësuan progresin e dukshëm të administratës doganore shqiptare në modernizimin e sistemeve, përafrimin me acquis, rritjen e kapaciteteve dhe bashkëpunimin ndërkufitar. Palët përmbyllën takimin duke dakordësuar prioritetet e fazës së ardhshme, përfshirë finalizimin e procesit të përafrimit dhe zbatimin e sistemeve të reja doganore. 

Drejtoria e Përgjithshme e Doganave riafirmoi angazhimin për të vijuar me reformat strukturore dhe modernizimin e shërbimeve, me synimin për t’i afruar qytetarët dhe bizneset me standardet europiane dhe për të përmbushur objektivat e Shqipërisë në procesin e anëtarësimit në Bashkimin Evropian.