Bashkëpunimi Dypalësh Shqipëri–Itali, Dogana Shqiptare e Pranishme në Samitin Qeveritar në Romë (Publikuar dt. 14/11/2025)

Dje, në Romë, u zhvillua Mbledhja e Parë Ndërqeveritare (Government to Government – G2G) midis Republikës së Shqipërisë dhe Republikës Italiane, një moment historik që shënon thellimin e partneritetit strategjik mes dy vendeve dhe forcimin e bashkëpunimit në fusha kyçe të interesit të përbashkët.

 
Në këtë aktivitet të nivelit të lartë, ku Kryeministri Edi Rama u prit zyrtarisht nga Kryeministrja e Italisë, Giorgia Meloni, mori pjesë edhe Drejtori i Përgjithshëm i Doganave, z. Genti Gazheli, i cili ishte pjesë e delegacionit shqiptar në këtë format të rëndësishëm institucional.

 
Gjatë punimeve të mbledhjes, ministrat e kabinetit të të dy qeverive shkëmbyen një sërë marrëveshjesh dhe memorandume mirëkuptimi që mbulojnë fusha strategjike si mbrojtja civile, siguria kibernetike, shëndetësia, ekonomia, kultura, energjia, etj..

Pjesëmarrja e Drejtorit të Përgjithshëm të Doganave në këtë mbledhje nënvizon rolin e rëndësishëm të bashkëpunimit dypalësh doganor, i cili është forcuar ndjeshëm sidomos pas nënshkrimit në Tiranë, në vitin 2024, të marrëveshjes së bashkëpunimit mes Drejtorisë së Përgjithshme të Doganave të Shqipërisë, Agjencisë së Doganave dhe Monopoleve Italiane dhe Guardia di Finanza-s italiane. Kjo marrëveshje ka synuar rritjen e efikasitetit në luftën kundër trafiqeve të paligjshme, shkëmbimin e informacionit, trajnimin e përbashkët dhe rritjen e kapaciteteve operacionale.

 
Drejtoria e Përgjithshme e Doganave mbetet e angazhuar në vijimin e bashkëpunimit të ngushtë me partnerët italianë, me qëllim forcimin e sigurisë kufitare, rritjen e transparencës dhe modernizimin e proceseve, në funksion të interesit publik dhe të përmbushjes së standardeve europiane.