Forcimi i bashkëpunimit rajonal kundër trafikimit përmes konteinerëve (Publikuar dt. 13/11/2025)

Në një realitet tregtar gjithnjë e më të ndërlidhur globalisht, metodat e sofistikuara të fshehjes së mallrave nëpër konteinerë dhe itineraret e shumta të përdorura nga grupet e krimit të organizuar, përbëjnë sfida serioze për autoritetet ligjzbatuese dhe rrezik për sigurinë rajonale.

Në këtë kuadër, më datë 6 nëntor 2025, në selinë e SELEC në Bukuresht u zhvillua takimi i Container Security Task Force, i cili mblodhi përfaqësues të autoriteteve doganore dhe të rendit nga vendet anëtare, mes tyre edhe Administrata Doganore Shqiptare, për të forcuar bashkëpunimin ndërkombëtar dhe për të adresuar aktivitetet e paligjshme të lidhura me trafikimin përmes konteinerëve.

Gjatë takimit u shkëmbyen përvoja dhe praktika të mira mbi profilizimin e dërgesave me risk të lartë dhe përdorimin e qasjeve të bazuara në të dhëna për identifikimin e rrjeteve kriminale. Po ashtu, u diskutuan raste konkrete të bashkëpunimit ndërkufitar që kanë çuar në sekuestrime të rëndësishme dhe në çmontimin e rrjeteve të krimit të organizuar transnacional.

Pjesëmarrësit theksuan rëndësinë e koordinimit më të ngushtë midis agjencive doganore, policore dhe operatorëve portualë, për t’iu përgjigjur në mënyrë efektive taktikave gjithnjë në ndryshim të fshehjes së mallrave të paligjshme.

Gjithashtu, u prezantua një përmbledhje rajonale e tendencave të trafikimit, me fokus te mallrat më shpesh të përdorura për fshehje në konteinerë dhe modelet e aktivitetit kriminal në këtë fushë. Në bazë të këtyre analizave, Task Forca rekomandoi prioritetet e ardhshme për shtetet anëtare me qëllim forcimin e kapaciteteve operacionale dhe parandalimin e këtij fenomeni kompleks.

E krijuar në vitin 2005 dhe e koordinuar nga Administrata Doganore e Greqisë, Container Security Task Force vijon të luajë një rol të rëndësishëm në forcimin e bashkëpunimit rajonal dhe ndërtimin e qëndrueshmërisë kundër krimit të lidhur me transportin përmes konteinerëve.