Takim i Drejtorit të Përgjithshëm të Doganave me përfaqësuesit e Doganës Franceze (Publikuar dt. 03/09/2025)

Drejtori i Përgjithshëm i Doganave, z. Genti Gazheli, zhvilloi një takim pune me Atasheun Doganor pranë Ambasadës së Francës për Europën Juglindore dhe rajonin e Ballkanit, z. Hugues Chevalier, si dhe me zëvendësin e tij, z. Benjamin Offroy.

Qëllimi i takimit ishte forcimi i bashkëpunimit mes Doganës Shqiptare dhe Doganës Franceze, duke shkëmbyer eksperienca dhe praktika të mira në fushën doganore. Në këtë kuadër, z. Gazheli informoi përfaqësuesit francezë mbi përpjekjet e vazhdueshme të Administratës Doganore Shqiptare për të përmbushur detyrimet dhe standardet në kuadër të Kapitullit 29 – Bashkimi Doganor, si pjesë e procesit të integrimit europian. Ai theksoi se Dogana Shqiptare është e angazhuar plotësisht në përmbushjen e reformave dhe detyrimeve që lidhen me aderimin në familjen e madhe doganore të Bashkimit Europian.

Nga ana e tij, Atasheu Doganor francez, z. Chevalier, vlerësoi progresin e bërë nga pala shqiptare dhe theksoi gatishmërinë e Doganës Franceze për të mbështetur këtë proces. Në mënyrë të veçantë, ai shprehu angazhimin për të asistuar Doganën Shqiptare në fushat e kontrollit të anijeve, hetimit doganor, si dhe të analizës së riskut dhe menaxhimit të informacionit.

Takimi u zhvillua në një frymë bashkëpunimi dhe mirëkuptimi, duke hapur perspektiva të reja për thellimin e marrëdhënieve mes dy administratave doganore dhe për fuqizimin e rolit të Doganës Shqiptare në kuadër të proceseve integruese europiane.