Dogana Shqiptare në faqet e revistës ndërkombëtare RILO ECE Herald 2/2025 (Publikuar dt. 21/08/2025)

Zyra Ndërlidhëse Rajonale e Inteligjencës për Evropën Qendrore dhe Lindore (RILO ECE), në numrin e saj të radhës Herald 2/2025, ka pasqyruar punën e Doganës Shqiptare me dy artikuj të veçantë, të botuar në faqet 24–26 të revistës.

 
Sekuestrimi i mallrave që shkelin të drejtat e pronësisë intelektuale

 
Artikulli “Seizure of IPR goods” sjell në vëmendje rastin e sekuestrimit nga Dogana Shqiptare të një sasie të konsiderueshme mallrash të dyshuara për shkelje të të drejtave të pronësisë intelektuale.

Ky publikim e vlerëson si një shembull të qartë të angazhimit të Administratës Doganore për mbrojtjen e konsumatorëve dhe zbatimin rigoroz të legjislacionit doganor, në përputhje me praktikat më të mira ndërkombëtare.

 
Konferenca e Nivelit të Lartë në Tiranë

 
Artikulli “Western Balkans and EU customs leaders reaffirm commitment to deeper integration and seamless trade” thekson rolin e Doganës Shqiptare si institucion pritës i Konferencës së Nivelit të Lartë të Drejtorëve të Përgjithshëm të Doganave të Ballkanit Perëndimor dhe vendeve të BE-së, e mbajtur në Tiranë më 12 qershor 2025.

Ky takim i rëndësishëm riafirmoi angazhimin e përbashkët për bashkëpunim strategjik, lehtësim të tregtisë dhe përafrim me standardet e Bashkimit Evropian.

 
Një vlerësim ndërkombëtar për Doganën Shqiptare

 
Ky publikim ndërkombëtar, i realizuar nën kujdesin e Organizatës Botërore të Doganave, është një tjetër dëshmi e rolit aktiv të Doganës Shqiptare në forcimin e sigurisë, integrimin rajonal dhe modernizimin e shërbimeve doganore.