Dy ligje të reja për markat tregtare dhe patentat – roli i Doganës Shqiptare në mbrojtjen e të drejtave të pronësisë intelektuale (Publikuar dt. 20/08/2025)

Prej datës 16 gusht kanë hyrë në fuqi dy ligje të rëndësishme që rregullojnë fushën e pronësisë industriale në Shqipëri:

• Ligji “Për markat tregtare”
• Ligji “Për patentat, modelet e përdorimit dhe certifikatat e mbrojtjes shtesë”

Këto ligje përmbushin një objektiv madhor të qeverisë shqiptare për përafrimin e plotë të kuadrit ligjor me standardet e Bashkimit Evropian, duke ofruar mbrojtje më të gjerë dhe më të fortë për shpikësit, bizneset, qytetarët dhe profesionistët e fushës.

Çfarë sjellin rishtas këto ligje?

• Mbrojtje të forcuar të markave tregtare dhe patentave, duke parandaluar abuzimet, falsifikimet dhe përdorimet e paautorizuara.
• Përafrim të plotë me legjislacionin e BE-së, si direktivat dhe rregulloret përkatëse mbi markat, patentat dhe certifikatat e mbrojtjes shtesë.
• Procedura të qarta dhe të detajuara për regjistrimin, përdorimin, transferimin dhe mbrojtjen ligjore të këtyre të drejtave.
• Garanci për konsumatorët dhe bizneset, duke shmangur pasojat ekonomike dhe tregtare të mallrave të falsifikuara ose që shkelin të drejtat e pronësisë intelektuale.

Roli i Doganës Shqiptare
Drejtoria e Përgjithshme e Doganave ka një rol thelbësor në mbrojtjen e të drejtave të pronësisë intelektuale, duke qenë në vijën e parë të kontrollit të qarkullimit ndërkufitar të mallrave. Në përputhje me ligjet e reja dhe dispozitat e Kodit Doganor, Dogana Shqiptare:

• Parandalon importin dhe/ose eksportin e mallrave që cenojnë të drejtat e markave tregtare apo patentave.
• Zbaton masa ndaluese dhe sekuestroje ndaj mallrave të dyshuara si shkelëse të të drejtave të pronësisë intelektuale.
• Bashkëpunon me pronarët e të drejtave dhe autoritetet përkatëse për nxjerrjen jashtë qarkullimit dhe konfiskimin e mallrave të falsifikuara.
• Informon dhe këshillon udhëtarët që mallrat pjesë e bagazhit personal lejohen vetëm kur janë të një natyre jo-tregtare, brenda limiteve duty free dhe pa tregues të dyshimtë që lidhen me trafikun tregtar.

Mesazh për qytetarët dhe bizneset
Çdo udhëtar, importues apo eksportues këshillohet të sigurohet që mallrat që sjell ose nxjerr nga territori i Republikës së Shqipërisë të mos shkelin të drejtat e pronësisë intelektuale. Shkeljet në këtë fushë përbëjnë vepra të dënueshme sipas ligjit dhe sjellin pasoja ligjore dhe financiare.

Nëpërmjet zbatimit të dy ligjeve të reja dhe rolit aktiv të Doganës Shqiptare, garantohet një treg më i ndershëm, më i sigurt dhe në përputhje me standardet evropiane, duke mbrojtur interesat e sipërmarrjes, qytetarëve dhe konsumatorëve.